1,383 Бардыгы /

ЖАЛАЛ-АБАД. Ушул жылдын 1-майынан тарта Сузак районунун “Телтору” ат майданында өтүп жаткан көк бөрү боюнча республикалык чемпионат жыйынтыкталды.

Иш-чара милициянын генерал-лейтенанты Молдомуса Конгантиевдин жаркын элесине жана 9-май Жеңиш күнүнө карата уюштурулган. Анда республика боюнча 35 команда күч сынашты. Кечээ, “Жеңиш кубогу–2023” оюндарынын финалдык беттеши өтүп, баш байгени Ош облусунун “Достук” клубу жеңди. Экинчи орунду Чүй облусунун “Сары-Өзөн”, үчүнчү орунду Талас облусунун “Ынтымак” командасы багындырды. Жеңүүчү командаларга 700, 400 жана 200 миң сомдук акча каражаттарынын сертификаттары тапшырылды. Ага катар кубок жана медалдар ыйгарылды.

Спорттук саамалыкка Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, Жогорку Кеңештин депутаттары Мейкинбек Абдалиев, Айбек Маткеримов, Маданият, маалымат, спорт жана жаштар саясаты министрлигинин алдындагы Дене тарбия жана спорт департаментинин директору Айбек Абдымомунов, республикалык “Көк бөрү” федерациясынын президенти Таласбек Бегалиев, облустук-мекеме ишканалардын жетекчилери жана 10 миңге жакын көк бөрү сүйүүчүлөр катышты.

Ыйгарым укуктуу өкүл тогуз күн аралыгында Жалал-Абад жергесинде ири көк бөрү майрамы өткөнүн белгиледи. Жеңүүчү командаларды куттуктап, облуста мындан ары да масштабдуу спорттук мелдештерди өткөрүү аракеттери колго алынаарын кошумчалады.

“Телтору” ат майданындагы көк бөрү мелдешинин алкагында улуттук ат оюндары да өткөрүлүп, жеңүүчүлөргө диплом жана акчалай сыйлыктар берилди.