933 Бардыгы /

БИШКЕК. ИИМдин Криминалистика кызматы 99 жылдык мааракесин белгилөөдө. ИИМдин басма сөз кызматы билдиргендей, кызматтын кызматкерлери кесиптик майрамын иш орундарында тосуп алышты. Криминалист – кылмыш болгон жерге биринчи келген адам. Бул кызмат укук коргоо органдарынын тутумундагы эң маанилүү бөлүктөрдүн бири деп эсептелет. Көп учурда эксперт-криминалисттердин жардамы менен гана кылмышкерлерди таап, резонанс жараткан иштерди ачууга мүмкүнчүлүк түзүлөт. Криминалистикалык кызматтын кызматкерлери көзгө көрүнбөгөн издерин издөө жана ондогон экспертизаларды жүргүзүү менен алектенишет. Криминалисттин жумушу коомчулук үчүн жабык болуп саналат.
Дээрлик бир кылым мурда, 1924-жылы Кара-кыргыз автоном облусунун кылмыш
иликтөө бөлүмүнүн алдында фотоаппарат жана микроскоп менен гана
куралданган эксперт-дактилограф, эксперт-графолог жана фотограф иштеген
алгачкы криминалисттик лаборатория иштей баштаган.
Криминалистика кызматы майда топтордон баштап, күчтүү структурага чейин
өсүп келген. Бүгүнкү күндө ансыз Ички иштер министрлиги иш алып бара
албайт. Кызматтын катарларында кылмыштуулукка каршы күрөшүүдө ички иштер
органдарынын кесипкөй, өз жумушуна берилген, мыкты илимдин жана
техниканын жетишкендиктерин киргизүүнү аракет кылган квалификациялуу,
адистер иштешет. 
Бул адистер көптөгөн экспертизаларды жүргүзүшөт – манжалардын изин алуу,
бычак жана ыргытуучу куралдарды, трасологиялык, баллистикалык,
наркотикалык заттарды жана прекурсорлорду текшерүү.
2023-жылдын башынан бери эле криминалисттер 1776 түрдүү экспертизаларды
жүргүзүп, 464 маалыматтык билдирүү даярдап, беришкен. Ал эми, 7371 окуя
болгон жерди кароодон өткөрүшүп жана 1465 ар кандай тергөө аракеттерине
катышкан.
Кесиптик майрамга карата ИИМдин борбордук аппаратында майрамдык иш-чара
болуп, ага ички иштер министринин орун басары, милициянын генерал-майору
Эркебек Аширходжаев, ИИМдин Криминалистикалык кызматынын башчысы,
милициянын полковниги Александр Иванов жана бөлүктүн өздүк курамы
катышты.
“Урматтуу кесиптештер! Сиздерди Кызматтын түзүлгөндүгүнүн 99 жылдыгы
менен куттуктап, кесиптик ийгиликтерди, үй-бүлөңүздөргө чың ден соолук,
үй-бүлөлүк бакыт каалайм! Сиздердин эмгегиңиздер эң чоң урмат-сыйга,
ыраазычылыкка жана колдоого татыктуу. Өлкөнүн бейпил жашоосун камсыз
кылууга күн сайын эбегейсиз салым кошуп келдиңер. Кыйынчылыктарга карабай өз милдетин аткарган криминалистика бөлүмдөрдүн ардагерлерин кесиптик майрамы менен чын дилимден куттуктайм. Ден соолук, күч-кубат жана ийгиликтерди каалайм. Сизге жана сиздердин жакындарыңызга
гүлдөп-өнүгүүнү, бардык сиңирген эмгегиңиз үчүн сый-урматты чын
жүрөгүмдөн каалайм!” – деди Эркебек Аширходжаев.
Жыйын соңунда криминалистика кызматынын кызматкерлери жана ардагерлери
министрликтин сыйлыктары менен сыйланышты.