894 Бардыгы /

          ОШ. Саламаттык сактоо министрлигинин Мобилдик мульти-диагностикалык комплекси Алай районунун тургундарын бекер эле медициналык кароодон өткөрүп жатат. Мындай жөрөлгө эң алыскы аймактардын тургундарына жеткиликтүү медициналык жардам көрсөтүү демилгесинин алкагында гана жүрүгүзүлүүдө.

          Саламаттык сактоо министрлигинин Мобилдик мульти-диагностикалык комплекси Алай районунун бардык жашоочуларын бекер медициналык кароодон өткөрүп, а түгүл дарылап жана бекер консультация дагы берип жаткан маалы. Ошондой эле диагностикалык кызматтар дагы ыңгайлуу жана жеткиликтүү форматта жетиштүү көрсөтүлүүдө. Айтмакчы, диагностикалык көчмө комплекс заманбап жабдуулар менен жабдылган, Анда ар кандай ооруларды медициналык изилдөөгө жана диагностикалоого кеңири мүмкүнчүлүк дагы бар. Комплекстин курамында анализ жүргүзүү үчүн лаборатория, КТ, маммограф, УЗИ аппараты, рентген аппараты, кичи операциялар үчүн операциялык бөлмө жана башка атайын аппараттар бар.

          Баса, ушул кезге дейре Алай районунун 7553 тургуну медициналык кароодон өтүп, 37 миңден ашууну медициналык кеп-кеңеш алышты. Мульти-диагностикалык мобилдик комплекстин иши калкка сапаттуу жана өз убагында медициналык жардам көрсөтүүгө гана багытталган. Эскерте кетчү жагдай: аталган долбоор 5 жылга эсептелген. Бул убакыт аралыгында Ислам өнүктүрүү банкы мобилдик клиниканы тиешелүү дары-дармектер, жабдуулар жана күйүүчү-майлоочу каражаттар менен, ал эми медицина кызматкерлерин эмгек акы менен камсыз этет. Мобилдик клиникада дарыгерлердин кабинеттери, анализ жүргүзүү лабораториясы, КТ жана маммограф, операциялык бөлмө, рентген аппараты, гастроскоп, көчмө скрининг борбору жана башкаруу борбору бар. Мобилдик клиникалардын курамында калкты ташыган кичи автобустар, анын ичинде С классындагы тез жардам унаасы дагы бар.

Алишер ТОКСОНБАЕВ, өз кабарчы