945 Бардыгы /

          ЖЕНЕВА. Кыргыз Республикасынын Саламаттык сактоо министри Гүлнара Баатырова Швейцариянын Женева шаарында өткөрүлгөн Бүткүл дүйнөлүк саламаттык сактоо ассамблеясынын (ДССА) 76-сессиясына катышты.

          Кыргыз Республикасынын Саламаттык сактоо министрлигинен билдиришкендей, аталган сессиянын жүрүшүндө бир катар стратегиялык тегерек үстөлдөр дагы өткөрүлдү. Иш-чаранын жүрүшүндө Дүйнөлүк саламаттыкты сактоо Уюмунун (ДССУнун) делегаттары, өнөктөш институттар, жарандык коомдун өкүлдөрү жана ДССУнун эксперттери глобалдык маанидеги коомдук саламаттык сактоонун учурдагы жана келечектеги артыкчылыктарын кенен-чонон талкуулашты. Бул сапарынын жүрүшүндө саламаттык сактоо министри Гүлнара Баатырова саламаттык сактоо тармагындагы кызматташтыкты чыңдоо боюнча мындан аркы кадамдарды талкуулоо максатында Дүйнөлүк саламаттык сактоо уюмуна мүчө бир катар мамлекеттердин делегация башчылары менен дагы кездешти. Мындан тышкары ДССУнун 76-сессиясы башталган күнү «Ден соолук баары үчүн» жана «Спорт ден соолук үчүн» принциптерин жайылтуу максатында Бүткүл дүйнөлүк саламаттык сактоо уюмуна мүчө-мамлекеттердин бардык делегациялары жарышка дагы активдүү катышышты.

          МААЛЫМАТ ИРЕТИНДЕ: Бүткүл дүйнөлүк саламаттык сактоо ассамблеясы – Бүткүл дүйнөлүк саламаттык сактоо Уюмунун жогорку чечим кабыл алуучу органы. Ассамблеянын негизги функциялары: Уюмдун багытын аныктоо, Башкы директорду дайындоо, Уюмдун каржылык ишмердигин тыкыр көзөмөлдөө, сунушталган программалык бюджетти кароо жана бекитүү. Анын жылдык сессиялары Швейцариянын Женева шаарында гана өткөрүлөт.

          Алишер ТОКСОНБАЕВ, өз кабарчы