789 Бардыгы /

Кыргызстандын Тышкы иштер министрлиги Орусиядагы мигранттардын укугун коргоочу Валентина Чупиктин элчилик Украинадагы согушка күч менен жөнөтүлгөн кыргызстандыктардын укугун коргобой жатат деген билдирүүсүн четке какты.

Чупик “Вот так” каналына берген маегинде ага июнь айынын башынан бери үч мигрант кайрылганын, алар мажбурлоо менен Украинадагы согушка катышуу боюнча келишимге кол коюшканын айткан.

Ошол эле учурда укук коргоочу кайсы өлкөнүн жараны жардам сурап кайрылганын тактаган эмес. Бирок Орусия Украинага басып киргенден берки мигранттардын укуктарынын корголушу жөнүндө айтып жатып, “Кыргызстан элчилиги жарандарынын ур-токмокко алынышы жана согушка мажбурланышы жөнүндө маалыматтарга реакция жасабай жатканын” белгилеген.

Буга жооп катары Кыргызстандын Тышкы иштер министрлиги “бүгүнкү күнгө карата Кыргызстандын Орусиядагы элчилигине да, Тышкы иштер министрлигине да жарандардан жана алардын жакын туугандарынан Украинадагы согуштук аракеттерге мажбурлоо жөнүндө эч кандай билдирүү түшкөн жок”, деп билдирди.

Элчилик Орусияда кыргызстандыктардын укуктарын жана мыйзамдуу кызыкчылыктарын коргоо боюнча тынымсыз иш алып барып жатканын кошумчалайт.

2022-жылдын 24-февралында Путиндин буйругу менен Орусия Украинага бастырып кирген. Ошол эле жылдын сентябрь айында мобилизация жарыялаган. Ушундан кийин Орусиядан жүз миңдеген адамдар чыгып кеткен. Тескерисинче, жүз миңдеген адамдар, анын ичинде борборазиялык мигранттар, абакта отургандар ар кандай шартта согушка тартылган.

Буга чейин Украинадагы согушка орус армиясынын катарында барган эки кыргыз жараны, теги кыргызстандык орус жарандыгын алган бир нече адам набыт болуп, алардын сөөгү Кыргызстанда жерге берилген.

WWW.