1,020 Бардыгы /

          ЫСЫК-КӨЛ. Ысык-Көл облусуна караштуу Чолпон-Ата шаарында Баткен өрүгүн саткан жай ачылат. Бул туурасында Чолпон-Ата шаарынын мэри Жапарбек Ормонов шардана кылды.

Ошентип, атайын дүкөндүн текчелерине экологиялык жактан таза, кургатылган өрүк жана өрүктөн жасалган натуралдуу азыктар кыдырата коюлат. Алдыда туристтер үчүн аталган жайда Баткен өрүгүн сатып алуу мүмкүнчүлүгү түзүлөт.

Буга дейре Баткен облусунун башчысы Абдыкарим Алимбаев жыл сайын туристтик сезон маалында Ысык-Көлдө Баткен өрүгү сатылган жайды иштетүүнү салтка айлантуу боюнча тийиштүү кызматкерлерге тапшырма берген эле. Мындай иш-аракетке жооптуу катары президенттин Баткен облусундагы ыйгарым укуктуу өкүлүнүн Эл аралык кызматташтык, инвестиция жана туризм секторунун башчысы Азизбек Адылбеков дайындалды.

Ошентип, аткарылып жаткан бул иш-чаранын башкы максаты — Баткен өрүгүн даңазалоо, өрүк өстүргөн багбандарды, өрүктү кайра иштеткен ишкерлерди колдоо, Кыргызстанга келген туристтерге экологиялык жактан таза айыл чарба продукцияларыбызды үстөккө-босток тартуулоо.

Алишер ТОКСОНБАЕВ, өз кабарчы