822 Бардыгы /

ЖАЛАЛ-АБАД. Тогуз-Торо районунда Жарандык коргонуу кызматы Казарман-Балыкчы жолунда “Табигый жана техногендик мүнөздөгү өзгөчө кырдаалдар коркунучу жаралганда жарандык коргонуу тутумунун аймактык башкаруу органдарынын күч каражаттарынын аракеттери” деген аталышта машыгуу өткөрдү.

Машыгууга Тогуз-Торо районунун акими Манас Мураталиев, акимдин биринчи орун басары Дамир Тагайбек уулу, акимдин орун басары Венера Мурзалымбекова, райондук мекеме-ишканалардын жетекчилери, Жарандык коргонуу кызматына кирген мекемелердин кызматкерлери катышты.

Машыгуунун жүрүшүндө сел, көчкү жана өрт катталган учурда тийиштүү кызматтардын техникалык жабдуулары текшерилди. Жабыркагандарга алгачкы медициналык жардамды көрсөтүү, кырсык катталган аймакта айыл өкмөттүн кызматкерлери тарабынан жарандарды коопсуз жайга көчүрүү боюнча жарандык коргонуу кызматына кирген мекемелердин даярдыгы текшерилди.

Машыгуунун жыйынтыгында жарандык коргонуу кызматынын кемчиликтери белгиленип, ал боюнча иш алып баруу тапшырмалары берилди жана даярдыгын кайрадан текшерүү максатында алдыда күтүүсүз чалуу менен текшерүү болоорун аким Манас Мураталиев эскертти.

Тогуз-Торо районунда Жарандык коргонуу кызматынын курамына 12 мекеме-ишкана кирет.