819 Бардыгы /

БИШКЕК. Кыргыз-Тажик чек арасындагы куралдуу кагылышта кыйраган үйлөрдүн курулушу дээрлик аяктады. Бул туурасында Президенттин Баткендеги ыйгарым укуктуу өкүлү Абдыкарим Алимбаев мамлекет башчысы Садыр Жапаров менен жолукканда гана ачыктады.

          Президенттин басма сөз кызматынан кабарлашкандай, Президенттин Баткендеги ыйгарым укуктуу өкүлү Абдыкарим АлимбаевБаткен облусунун инфратүзүмүн жакшыртуу, социалдык обьектилерди куруу жана дагы ири долбоорлорду жүзөгө ашыруу боюнча чаралар туурасында кеңири маалымат берди. Ал ошондой эле Баткен районунун Капчыгай жана Достук айылдарынын башкы планы түзүлгөндүгүн, аталган айылдар толугу менен кайрадан курулгандыгын, өрттөнгөн үйлөр толук бойдон калыбына келтирилгендигин дагы кошумчалады. Мындан тышкары кыйраган айылдардын ички жолдору асфальтталып, ошого жараша жарыктандыруу иштери жүргүзүлгөн, ичилүүчү суу системасы дагы салынган.

• Ошондой эле жарандык коргонуу комиссияларынын актыларына

ылайык, күйүп кеткен жана капиталдык ремонтко муктаж болгон үйлөрдүн ээлерине толук көлөмдө акча каражаттары берилген. Машинасынан, же малынан ажырагандарга дагы акчалай компенсациялар төлөндү, – деп кошумчалады Президенттин Баткендеги ыйгарым укуктуу өкүлү Абдыкарим Алимбаев.

          Президент Садыр Жапаров мындан ары дагы Баткен облусуна өзгөчө көңүл бурулаарын абдан катуу убадалады.

          Өткөн жылдын сентябрындагы чек ара чырында Баткендин бир катар айылдары талкаланып, бүтүндөй өрттөлгөн. Буга улай ондогон адамдар каза таап, миңдеген жергиликтүү тургун үй-жайын таштай качышкан. Бийлик Баткенде жаңы 420 үйдү куруп берүүнү убада кылган. Куралдуу кагылышта кыйраган үйлөрдү куруу үчүн “Аманат Строй Инвест” жалдаган айрым компаниялар жергиликтүү ишкерлердин акчасын бербей убара кылып жатканы дагы белгилүү болгон. Маселе Жогорку Кеңеште дагы бир нече жолу айтылып, тендерди уткан компанияны жоопко тартуу сунушу көтөрүлгөн.

          Баса, журналисттер Достук жана Капчыгай айылдарында үй салган эки компания ишкерлердин 20 миллиондон ашык сомун бере электигин жеринен билип келишкен. Ички иштер министрлиги Баткен облусундагы чек ара жаңжалында талкаланган турак жайларды калыбына келтирүү ишине катышкан “Келечек ЛТД” курулуш компаниясынын өкүлү кармалгандыгын, ал эми “Алмалы-Доор Курулуш” ишканасынын жетекчисине издөө салынгандыгын жарыялаган.

          Аталган куралдуу кагылыштан соң эки тарап бири-бирин “агрессияга” айыптаган. Анда Кыргызстандын 63 жараны курман болгон, 206 киши ар кандай даражада жараат алган. Тажикстандын Тышкы иштер министрлиги 41 жараны каза тапкандыгын, 200гө чукулу жараат алгандыгын билдирген. Каза тапкандар арасында эки тараптан тең балдар бар.

Алишер ТОКСОНБАЕВ, өз кабарчы