861 Бардыгы /

ЖАЛАЛ-АБАД, Жалал-Абад облусуна караштуу Чаткал районунда 1,17 миллион долларлык эки заманбап кар көчкү бекети акыры ишке киргизилди. Бул туурасында Өзгөчө кырдаалдар министрлигинен билдиришти.

Маалыматка ылайык, аталган бекеттерди орнотуу «Кыргыз Республикасында тобокелдиктерди комплекстүү башкаруу жана Борбордук Азияда регионалдык кызматташуу боюнча потенциалды чыңдоо» долбоорунун алкагында Жапониянын колдоосу аркасында гана жүзөгө ашырылган. Аталган бекеттер реалдуу убакыт режиминде так маалымат берип, калкты кар көчкү коркунучу тууралуу алдын ала кабардар кылып турат. Ошондой эле бул калктын коопсуздугун дагы жакшыртмакчы. Бул демилге Жапония БУУӨП (Бириккен Улуттар Уюмунун өнүктүрүү программасы) аркылуу Борбор Азия аймагында климаттын өзгөрүшүнө каршы күрөшүү боюнча чараларды жүзөгө ашырууга, мунун ичинде Жалал-Абад жана Нарын облустарында кар көчкүнүн мониторингинин үч бекетин орнотууга колдоо көрсөтүү максатында жүзөгө ашырылды. Долбоордун жалпы наркы 1,17 миллион АКШ долларды чапчыды.

Аталган обьектилерди пайдаланууга тапшыруу аземине Жапониянын Кыргызстандагы элчиси Хидеки Года, БУУнун өнүктүрүү программасынын Кыргызстандагы өкүлү Александра Соловьева, Өзгөчө кырдаалдар министрлигинин жана жергиликтүү бийликтин жетекчилери катышышты.

Алишер ТОКСОНБАЕВ, өз кабарчы