804 Бардыгы /

ЖАЛАЛ-АБАД. 21-октябрда Жалал-Абад шаарындагы Курманбек стадионунда “Чек талап кылып, байге утуп ал” лотереясынын жеңүүчүлөрүн аныктоо иш-чарасы өттү.
Жалал-Абад шаардык мэриясынын маалымат борбору билдиргендей,
Иш-чарага Жалал-Абад шаарынын мэри Эрнисбек Ормоков, шаардык кеңештин депутаты Ахмед Абдыкаев, Мамлекеттик салык кызматынын Жалал-Абад шаардык башкармалыгынын башчысы Эркинбек Мамаюсупов, “Айыл Банк” ААКнын Жалал-Абад филиалынын жетекчиси Мирлан Азимбаев, “Кыргыз петролеум компани” ЖАКтын вице-президенти Эрмек Энназаров жана шаар тургундары катышты.
Иш-чаранын ачылуу аземинде сөз сүйлөгөн калаа башчысы: “Бул лотереяны уюштуруудан негизги максат – жарандардынККМ чекти талап кылууга болгон кызыгуусун арттыруу менен көмүскө экономиканы ачыкка чыгаруу болуп саналат,”-деп баса белгиледи.
Мамлекеттик салык кызматы тарабынан өткөрүлүп жаткан лотерея өлкө боюнча аймактар арасында Жалал-Абад шаарында алгачкылардан болуп өзүнчө уюштурулду. Аны өткөрүүгө жергиликтүү бюджеттен бир миллион сом акча каражаты бөлүнгөн.
Лотереянын алдын ала жыйынтыгы боюнча баш байге – 100 миң сом акча каражатын Жалал-Абад шаарынын тургуну, Нураида Айтбаева аттуу жаран жеңип алды. Мындан сырткары дагы 128 жаран 5 миң сомдон, 50 миң сомго чейинки байгелерге ээ болушту.
Белгилей кетсек, жеңүүчүлөрдү атайын түзүлгөн комиссия курамы текшерип, анын жыйынтыгы менен сыйлыктардын сертификаттары тапшырылат.