873 Бардыгы /

Ош облусунун Кара-Су районундагы Кара-Суу базарында иштеп жатышкан ондогон соодагерлер көзөмөл-кассалык машинелерди (ККМ) колдонууга каршы экендигин билдирип, кечээ. 29-ноябрда Кара-Суу райондук мамлекеттик акимчилигинин алдына нааразычылык акциясына чыгышты.

    Нааразычылык акциясына катышкан ишкерлер – соодагерлер ККМге каршы экендиктерин жана 2024-жылдан баштап буга чейин калып калган товарлардын эсеп-фактурасы жок болсо айып салынат деген чечимге каршы болуп жатышкандыгын ачык айтышты. Ишкерлердин айрымдары а түгүл райакимчиликтин имаратына дагы киришип, жергиликтүү бийликтин өкүлдөрү менен бетме-бет жолугушушту.

    Айтмакчы. Кара-Суу базары – Борбор Азиядагы эң ири соода жайларынын бири. Анда 5 миңден ашык киши эмгектенет. Кыргызстандын бийлиги соёку эки жылдан   бери өлкөдө товар саткан ишкерлердин баарын көзөмөл-кассалык машиналарды (ККМ) колдонууга милдеттендирип жатат. Ага кошумча товардык-транспорттук коштомо кагаздын электрондук түрү (ЭТТН) жана электрондук эсеп-фактура (ЭЭФ) дагы киргизилди. Буга байланыштуу Бишкек шаарында, башка аймактарда бир нече жолу нааразылык акциялары өттү.

    ККМ – бул товар сатуу жана кызмат көрсөтүү үчүн керектелген эсептөөчү аппарат. ЭТТК – товар, жөнөтүүчү, алуучу жана жеткирүүчү транспорт каражаты жөнүндө маалыматтарды жана башка маалыматтарды камтыган электрондук документ. ЭЭФ – кошумча нарк салыгын эсептөө үчүн керектеле турган, товар саткан жана кызмат көрсөткөн тарап толтура турган конкреттүү үлгүдөгү салыктык документ.

Алишер ТОКСОНБАЕВ, өз кабарчы