1,047 Бардыгы /

Кримтөбөл Камчы Көлбаевге байланыштуу кармалган Ош облусуна караштуу Өзгөн шаарынын мэри Дамир Моңолдоровдун бөгөт чарасы өзгөртүүсүз калтырылды. Кечээ, 29-ноябрда, Ош облустук соту шаардык соттун Моңолдоровду камакта кармоо тууралуу чечимин күчүндө калтыргандыгын кабарчыбызга анын жактоочусу Жылдыз Кадырова билдирди.

    Ушул жылдын 14-ноябрында Ош шаардык соту Өзгөн шаарынын мэриДамир Моңолдоровдун ишин карап жаткан тергөөчүнүн өтүнүчүн жарым-жартылай канааттандырып, аны 9-декабрга чейин камакта калтырган эле. Ал эми жактоочу Жылдыз Кадырова мындай чечим мыйзамсыз деген пикирин билдирип, Ош облустук сотуна апелляциялык арыз менен кайрылган. 15-ноябрда Улуттук коопсуздук боюнча мамлекеттик комитет (УКМК) Моңолдоров кармалгандыгын, ага “Өмүргө жана ден соолукка коркунучтуу зомбулук көрсөтөм деп коркутуу” беренеси боюнча айып тагылгандыгын, ал “Кримчөйрөнүн анабашы” атыккан Камчы Көлбаевдин кылмыштуу тобунун ишине дагы катышкандыгын, топтун мүчөлөрүнүн жардамы аркасында аны сындаган активисттерди коркуткан деп шектелип жаткандыгын маалымдаган.

    Баса, Дамир Моңолдоров бул убакка дейре «Кыргызпочтасы» мамлекеттик ишканасынын жетекчиси, Ысык-Көл облусунун Жети-Өгүз районунун акими жана Балыкчы шаарынын мэри болгон. Өзгөн шаарына башчы болуп 2022-жылдын май айында дайындалган. Атайын кызматтын койгон айыбы боюнча анын жактоочулары азырынча комментарий берише элек.

Алишер ТОКСОНБАЕВ, өз кабарчы