489 Бардыгы /

Президент Садыр Жапаров 6-декабрда “Кабар” улуттук маалымат агенттигине Көзөмөл-кассалык машинелерди (ККМ) колдонууга каршы чыккан соодагерлердин митинги тууралуу маек берди.

Ал базардын ККМге өтүшүнө кызыкдар болгон салык кызматкерлери да бар экенин, ушундан улам 5-декабрда элге жаңы салык саясаты тууралуу маалымат берүү үчүн “Дордой” базарына барып ишкерлер менен жолукканын айтты.

Базарларда контейнер ээлери ар бирин 3000 доллардан 13 миң долларга чейин ижара берерин, бирок бир тыйын да мамлекетке салык төкпөй турганын билдирди.

“Ондон ашык контейнери бар мурдагы чиновниктер да бар экенин, элден сот, прокурор, УКМКнын кызматкерлеринин да контейнерлери бар деген маалыматтарды алганын” кошумчалады.

Журналисттин “элди митингге үндөгөндөр жазасыз кала береби?” деген суроосуна мындайча жооп берди.

“Эгер ушинтип улам-улам үндөп митинг кыла беришсе, алардын маселесин беш секундда чечебиз. Базарларга өкмөттүн атынан “Кумтөргө” тышкы башкаруу киргизгендей, тышкы башкаруу киргизебиз. Тез арада баарын ревизия кылып чыгабыз. Мурдагыларынан бери баарын казып чыксак эле мүлктөр, суммалар ачыкка чыгып калат. Эскинин баарын төлөөгө туура келип калат. Ага чейин барбай эле коелу деп күч органдарын токтотуп атам. Анткени, баары эле өзүбүздүн жарандар. Аларга мүмкүнчүлүк берели дедим”, – деди президент.

Садыр Жапаров ККМ системасы көмүскө экономиканы азайтуу үчүн киргизилип жатканын белгиледи. Анын сөзүнө караганда, “Кытайдан Кыргызстанга өткөн товарлардын көлөмү 14 миллиард долларды түзөт. Кыргызстандын статистикалык маалыматтары 4 миллиард долларды гана көрсөтүп жатат”.

Ал товар ташыгандар аны дүңүнөн сатып мамлекетке салык төлөбөй чыгып кетип жатышканын кошумчалады.

Акыркы эки жумада Кыргызстанда он миңдеген адам иштеген ири базарлардын соодагерлери ККМди колдонууга каршы акцияларга чыгып, айрымдары иш таштады.

29-30-ноябрда Оштогу Кара-Суу жана Бишкектеги “Дордой”, “Мадина”, Орто-Сай базары, 1-декабрда борбордогу “Аламүдүн”, Оштогу, Таластагы, Ысык-Көлдүн Каракол шаарындагы базарлардын сатуучулары митингге чыгышкан. 2-декабрда ушундай эле талап менен Бишкектеги автоунаа тетиктерин саткан “Кудайберген” базарынын соодагерлери иш таштаган.

5-декабрда Ош базарынын аймагындагы “Берекет Гранд” соода борборунун соодагерлери, Нарында базарда иштеген ишкерлер да ККМге каршы акция өткөрүштү.

Бул окуялардан кийин президент Садыр Жапаров 5-декабрда Бишкектин четиндеги “Дордой” базарында иштегендер менен жолугушуп, Кыргызстанда базардагы соодагерлерге июль айына чейин патент менен иштеп турууга уруксат берилгенин айтты.

Базарларда соода-сатык менен алектенгендер 2024-жылдын 1-январынан тартып ККМди милдеттүү түрдө колдонушу керек болчу. Ишкерлер ККМдин түйшүгү көп экенин билдирип, ага каршы чыгууда. Бийлик бул система кирсе, көмүскө экономиканын үлүшү азая турганын кайталап жатат.

WWW.