1,821 Бардыгы /

Тажикстандын эки жараны Орусияда аларды Украинага каршы аскердик кызмат өтөө келишим түзүүгө кантип мажбурлаганы тууралуу айтып беришти.

Согушка баруудан баш тарткандан кийин бири катаал кыйноолорго кабылып, майып болуп калса, экинчиси жөнсүз шылтоо менен Орусиядан депортацияланган.

Анварга (коопсуздук үчүн аты өзгөртүлдү) Москва облусундагы Сахарово миграциялык борборунда Украинага каршы согушка катышууну сунушташкан:

“Мен борборго киргенде эле дароо макулдугумду сурашты. Мен баш тарттым, согушка баргым келбейт дедим. Мага көп “акылдуусунба” деп айтышты, анан сабап башташты”.

Анвар борбордун кызматкерлерине согушка бара албасын, апасы бар экенин, аны караганга андан башка эч ким жок экенин түшүндүрүүгө аракет кылган.

Тажикстандан келген дагы бир мигрант – Мансур Хожиев. Ал 30 жашта. Аны Пермь крайындагы Свердлов районунун миграция бөлүмүндө согушка азгырууга аракет кылышкан:

“Былтыр убактылуу жашоого уруксат алгам, быйыл Орусиянын жарандыгын алууга арыз беришим керек болчу. 12-сентябрда Пермдеги Свердлов районунун миграция бөлүмүнө бардым. Башында документтеримди кабыл алгылары келген жок. Согушка катышуу үчүн алгач келишим түзүү керектигин айтышты. Мен баш тарттым. Алар “кол койбосоң, биз документтерди кабыл албайбыз” дешти”.

Анвардын айтымында, кыйноого жана ур-токмокко кабылган жалгыз ал эмес, согушка баруудан баш тартканы үчүн ушундай мамилеге кабылган дагы бир нече жигиттерди көргөн. Анвар катуу сабалгандан кийин майып болуп калганын айтат:

“Мен майып болуп калдым. Алар менин далыга көбүрөөк урушту. 17-күнү Кулябга жөнөтүштү, 5 жылдык мөөнөткө депортациялашты”.

Мансур Хожиев келишим түзүүдөн баш тартканы үчүн баңгизат колдонгон деп айыпталган.

“Күтүлбөгөн жерден төрт киши келип, колума кишен салып, башыма желим баштык кийгизип, малга окшотуп машинага салышты. Мени токойго алып келишти да, электрошокер колдонушту. Мен алардан “эмне үчүн?” деп сурадым. Алар менин оозумду жаап, “Сиздин суроо берүүгө укугуңуз жок” дешти. Алар менден баңги затын колдонгонумду моюнга алышымды талап кылышты”.

Кыйноого туруштук бере албаган Мансур күнөөсүн мойнуна алган кагазга кол койгон. Сотто актануу аракети жыйынтык берген эмес.

Анвар менен Мансурдун иши боюнча “Сахарово” администрациясынын же Свердлов райондук миграция департаментинин позициясы кандай экени белгисиз. “Озоди” радиосу менен “Мигрант медиа” долбоору аларга байланышка чыга алга жок.

Пермь крайынын Свердлов райондук сотунун чечиминде Мансур Хожиев маңзат колдонгон деген шек менен кармалганы айтылат. Мансур бул айыптоолорду негизсиз деп эсептейт.

Украинадагы согушта курман болгон Тажикстан жарандары тууралуу так маалымат жок. Орусия былтыр февралда Украинага кеңири масштабда аскерий чабуул баштагандан кийин түрмөдөгүлөрдү жана эмгек мигранттарын түрдүү жолдор менен согушка тартты. Тажик бийлиги согушка колонияларда отурган 100дөн ашуун тажикстандык катышканын ырастады.

WWW.