24 Бардыгы /

 Кыргызстандын Түштүк башкалаасынын мэриясы жапжаңы жана заманбап техникалар менен толукталды. Бул туурасында Ош шаарынын вице-мэри Сонунбек Жунусбаев билдирди.

Сонунбек Жунусбаевдин айтымында, мындан бир күн мурда Ош шаарынын Борборук аянтында Business House Kg курулуш компаниясы тарабынан алып берилген техникалар мэриянын өздүк балансына өткөрүлүп берилди.

Алардын ичинде төмөнкү үлгүдөгү техникалар бар:

– Faw Tiger VN суу ташуучу унаа;
– Faw Tiger VN таштанды жүктөөчү унаа;
– Sany SY155W Жеркелгич (экскаватор);
– Iveco Hongyan Genion жүк түшүрүүчү унаа;
– Isuzu Sav HD50 үлгүсүндөгү 3 автобус.

Техникаларды пайдаланууга тапшыруу аземине Ош шаарынын мэри Жеңишбек Токторбаев өзү дагы катышып, аталган курулуш компаниясынын өкүлдөрүнө терең ыраазычылыгын билдирип, жаңы автобусту адегенде өзү сынап көрдү.

Атайын техникалар «Оштогу көрктөндүрүү жана жашылдандыруу чарба комбинаты» муниципалдык ишканасына, ал эми автобустар Жапалак, Жибек Жолу жана Алымбек-Датка муниципалдык айылдык аймактык башкармалыктарына таратылды. Белгилей кетчүү жагдай: автобустар аталган аймактардагы окуучуларды билим берүү мекемелерине акысыз жеткирүү максатында гана пайдаланылат.

Алишер ТОКСОНБАЕВ, өз кабарчы