630 Бардыгы /

Кыргыз-Тажик мамлекеттик чек арасын делимитациялоо жана демаркациялоо боюнча Кыргызстандын жана Тажикстандын Өкмөттүк делегацияларынын укуктук маселелери боюнча жумушчу топтору менен топографиялык жумушчу топторунун кезектеги жолугушуусу 8-декабрдан 14-декабрга чейин Баткен шаарында өткөрүлдү.

          Акыркы маалыматка караганда. бул жолугушууларда топографиялык жумушчу топтор Кыргыз-Тажик мамлекеттик чек арасынын дагы 47,05 чакырымын өз ара макулдашты. Калган тилкелерди аныктоо үчүн кийинки жолугушуу Тажикстандын аймагында өткөрүлөт. Соңку жолугушуунун жыйынтыгында тиешелүү протоколго дагы кол коюлду. Кыргыз Өкмөтү сүйлөшүүлөр өз ара түшүнүшүү жана достук маанайда өткөндүгүн кошумчалады.  Кыргызстан менен Тажикстандын чек арасынын жалпы узундугу 972 чакырымды түзөт. 2002-жылдан 2020-жылдарга чейин чек аранын 519 чакырымы такталса, 2022-жылы эки өлкөнүн президенттери жолукканда жалпысынан 664 чакырым тилке боюнча орток пикир бар экендигин ырасташкан.

Кыргыз-Тажик чек арасын делимитациялоо жана демаркациялоо боюнча өкмөттүк делегациялардын топографиялык жумушчу топтору ошондон бери жумуштарын активдүү фазада гана улантып, тынымсыз жолугуп дагы жатышат. Алардын соңку – 29-ноябрдан 5-декабрга чейин Тажикстандын Бустон шаарында өткөн жолугушуусунда чек аранын дагы 24 чакырымы такталгандыгы шардана кылынган. Кыргызстан менен Тажикстандын өкмөттүк делегацияларынын тең төрагалары Камчыбек Ташиев менен Саймумин Ятимов быйыл 12-декабрда Баткен шаарында кездешип, Кыргыз-Тажик мамлекеттик чек арасын делимитациялоо жана демаркациялоо маселелерин катуу талкуулашкан. Анын соңунда Ташиев менен Ятимов атайын билдирүү жасап, Кыргыз-Тажик чек арасынын 90 пайызы макулдашылгандыгын билдиришкен. Ташиев анын ичинде Баткендеги «Баткендеги Кайрагач айылынан баштап Кулунду, Максат, Арка, Арка-1, Арка-2, Жаңы-Жер, Жийделикке чейинки айылдардын тушундагы такталбаган тилкелер макулдашылгандыгын» дароо ырастаган.

Баса, Кыргызстандын президент Садыр Жапаров ушул жылдын 11-декабрында Баткен облусунун Ак-Сай айылында жаңы курулган мектептин ачылышында сүйлөп жатып, Тажикстан менен чек ара 2024-жылдын жаз айына чейин такталып калаарын айткан эле. Бийлик ага чейин чек араны тактоо иштери ушул жылдын аягына чейин бүтөөрүн билдирген жайы бар.  

Алишер ТОКСОНБАЕВ, өз кабарчы