696 Бардыгы /

ЖАЛАЛ-АБАД. Бүгүн, 25-декабрда Жалал-Абад шаарындагы №1 Михаил Бабкин атындагы мектеп-гимназиясынын 3 кабаттан турган, 375 орундуу кошумча жаңы имаратынын ачылышы болду.

Ачылуу аземине Кыргыз Республикасынын Министрлер Кабинетинин Төрагасы-Президенттин Администрациясынын Жетекчиси Акылбек Жапаров, Президенттин Жалал-Абад облусундагы ыйгарым укуктуу өкүлү Абсаттар Сыргабаев, шаар мэри Эрнисбек Ормоков, шаардык кеңештин депутаттары, билим берүү бөлүмүнүн кызматкерлери жана мектеп жамааты катышты.

Иш-чарада сөз сүйлөгөн Акылбек Жапаров, мектеп-гимназия шаардагы алдыңкы билим уяларынын бири экенин белгилеп, жаңы имаратта окуучуларга жана мугалимдерге керектүү заманбап шарттар түзүлгөнүн билдирип, билим уясынын ачылуу аземи менен шаардыктарды куттуктады.

Курулуш республикалык бюджеттен каржыланып, 58 млн 720 миң сом жумшалды.

Эске салсак, аталган мектеп – гимназиянын имараты 1927- жылы курулган. Учурда мектепте 3 миңдей окуучу окуп келет.