750 Бардыгы /

Кыргызстандын Түштүк башкалаасындагы «Царский Двор» кафесинин имаратынын жанындагы бир даана даракты кыркып салышкан. Ошондуктан, коомчулук аталган кафенин сөзсүз түрдө бузулушун талап кылып жаткан чагы.

          Айтмакчы, Экологиялык жана техникалык көзөмөл кызматынын Ош регионалдык башкармалыгынан билдиришкендей, Ош шаарынын Ленин көчөсүнүн №324-2 дарегинде жайланышкан «Царский Двор» кафесинин имаратынын алдындагы Бака терек дарагынын жерден 2 метр бийиктиктен эч кандай уруксаты жок, мыйзамсыз түрдө кесип, өсүмдүктөр дүйнөсүнө зыян келтирилгендиги аныкталып, «Царский Двор»  кафесине 37 миң 639 сом 32 тыйын доо коюлуп, чара көрүү үчүн Ош шаардык ички иштер башкармалыгына расмий кат  менен материалдар даярдалып өткөрүлдү. Анткени, буга чейин Сулайман-Тоо МАБтын комиссиялык актысынын жана Кыргыз Республикасынын Жаратылыш ресурстары, экология жана техникалык көзөмөл Министрлигинин Ош регионалдык башкармалыгына кайрылган катынын негизинде экологдор жеринде карап чыгып, 15 даана дарактардын кооптуу бутактарына бутоо иштери үчүн макулдук берген.

          Бирок, Ош мэриясынан билдиришкендей, Ош шаардык муниципалдык менчик башкармалыгы «Царский Двор» кафеси менен түзүлгөн келишимди үзгөндүгүн шардана кылды.

          – Ленин көчөсүнүн №324-б-2 дарегинде жайгашкан 388 чарчы метр, 599 чарчы метр жерлерге жылына келишим түзүп, бир жылда ижара акы катары 1 миллион 750 сом төлөнүп жүргөн. Бир жылга келишим түзүлчү экен, 2024-жаңы жылдан баштап келишимди узартылган жок! Келишим үзүлдү. Бул боюнча катты дагы тапшырып, тааныштырып келишти. «Бошоткула, мурдагы калыбына келтиргиле!» деп айтылды, эгер бошотушпаса дагы тиешелүү катаал чаралар көрүлөт! – деди Ош мэриясынын коомчулук менен байланыш бөлүмүнүн башчысы Жумамидин Сулайманкулов.

          Аман турсак, Ош шаар мэриясынын чечими канчалык даражада аткарылат, аны дагы көрө жатаарбыз…

Алишер ТОКСОНБАЕВ, өз кабарчы