682 Бардыгы /

          Кыргызстан мусулмандарынын дин башкармалыгынын Уставына ылайык, Муфтийдин биринчи орун басары Самидин кары Атабаев мындан ары Муфтийдин милдетин дагы убактылуу аткаруучу болуп бекитилди.

          Анткени, ушул жылдын 26-январында Аалымдар Кеңешинин кезексиз жыйыны өткөн эле. Анда Муфтий Замир кары Ракиевдин өз каалоосу менен кызматтан кетүү тууралуу арызы канааттандырылды. Ракиев Кыргызстан мусулмандарынын Аалымдар Кеңешинин мүчөсү эле.

          Айтмакчы, Самидин Атабаев 51 жашта. Ал диний дагы, светтик дагы жогорку билимге ээ: 1991-1995-жылдары Кыргызстан Ислам институтунда, 2002-2006-жылдары Орусия Ислам университетинде, 2011-2016-жылдары Ош мамлекеттик юридикалык институтунда окуган. Эмгек жолун 2006-жылы Өзгөн районундагы «Абдираим кары» медресесинде окуу бөлүмүнүн башчысы болуу менен баштаган. 2008-2010-жылдары Өзгөн районундагы «Имам Аль-Бухарий» Ислам институтунун окуу иштери боюнча проректору, 2010-2015-жылдары Өзгөн районунун башкы имам хатиби, 2015-жылдан бүгүнкү күнгө чейин Ош облусунун казысы кызматтарын аркалаган.

          Баса, Самидин кары АТАБАЕВ 1999-жылы Москва шаарында өткөн Куран жарышында 3-орунду, 2002-жылы Татарстанда өткөн Куран жарышында 1-орунду, 2003-жылы Москва шаарында өткөн Куран сынагында 1-орунду ээлеген. 2015-жылы «Ош шамы» аны гезити «Жылдын мыкты жетекчиси» деп тапкан. Орус, түрк, өзбек жана араб тилдеринде эркин сүйлөйт.

          Алишер ТОКСОНБАЕВ, өз кабарчы