450 Бардыгы /

          Кыргызстандын Түштүк башкалаасындагы “Ош-Тазалык” муниципалдык ишканасы Төрөбай Кулатов кичи районунда жалпы аянты 105 чарчы метрди түзгөн, турмуш-тиричилик таштандыларын ылгоочу бешинчи аянтчаны пайдаланууга тапшырды.

          Ош шаарынын мэри Бакытбек Жетигенов аталган долбоор менен жеринде кеёири таанышып, шаардыктардын таштандыларды жыйноо маданиятын жогорулатуу максатында гана жүзөгө ашырылып жаткан долбоор шаардагы экологиялык акыбалды мындан ары бир топ жакшыртаарын баса белгиледи. Ошондой эле мындай аянтчалар шаардын бардык аймактарында дагы үстөккө-босток курулаарын кошумчалады.

          Белгилей кетчү жагдай: буга дейре шаар аймагында, тактап айтканда Гапар Айтиев, Эргеш Алиев, Александр Пушкин, Алай, Ленин көчөлөрүндөгү көп кабаттуу үйлөрдүн жанында дагы таштанды ылгоочу аянтчалар курулуп, пайдаланууга тапшырылган эле. Ошентип, шаар аймагы боюнча быйыл дагы жалпысынан 10 таштанды ылгоочу аянтчалар курулат. Бул долбоор «Ош-Тазалык» муниципалдык ишканасы тарабынан өз эсебинен гана ишке ашырылып, шаардын экологиялык абалын ого бетер жакшыртууга гана багытталган.

Алишер  ТОКСОНБАЕВ, өз кабарчы