285 Бардыгы /

БИШКЕК. Бүгүн,19-мартында ички иштер министри Улан Ниязбеков онлайн кеңешме өткөрүп, анда эки маселени талкууга алды. Алар “Нооруз” майрамында коомдук тартипти сактоо жана учурдагы кылмыштуулуктун абалы, аны алдын алуу жана коомдук тартипти жогорку денгээлде сактоонун негизги чаралары, биринчи чейректи ийгиликтүү жабууга арналган ар кыл маселелерди кеңири талдоого алынды.
ИИМдин басма сөз кызматы билдиргендей, Онлайн режиминде өткөн кеңешменин ишине министрдин орун басарлары, ИИМдин Борбордук аппаратынын тиешелүү кызматтарынын, Баткен, Ош, Жалал-Абад, Нарын, Ысык-Көл, Талас, Чүй облустарынын, Бишкек жана Ош шаарларынын ички иштер башкы башкармалыктарынын, башкармалыктарынын жетекчилери катышты.
Онлайн кеңешменин жүрүшүндө министр Улан Ниязбеков: “Жалпы ардагерлерди жана өздүк курамды келе жаткан “Нооруз” майрамы менен Ички иштер министрлигинин коллегия мүчөлөрүнүн жана жеке өзүмдүн атымдан чын жүрөгүмдөн куттуктайм! Баарыңыздар ден соолукта болуп, ишиңиздерди бир гана ийгиликтер коштоп, үй-бүлөңүздөр менен аман болуңуздар”,- деди.
Чогулуштун андан аркы жүрүшүндө: “Өзүңүздөргө белгилүү болгондой, 21-март-“Нооруз” майрамына карата бардык региондордо жана борбор шаарыбызда республикалык деңгээлдеги массалык-маданий иш-чаралар өткөрүлөт. Жарандардын коопсуздугун камсыздоо, анын ичинде жол кырсыктарын алдын алуу боюнча Ички иштер министрлигинин комплекстүү иш-мерчемин бекитип, баарыңыздарга таратып бердик. Анын негизги талаптары менен баарыңыздар тааныштыңыздар. Эң башкысы, коомдук тартипти натыйжалуу камсыздап, жүктөлгөн милдеттерди так
аткарыңыздар. Бир дагы аймакта массалык мушташууларга, коомдук
эрежелерди бузууларга, өз-ара чатакташууларга, бейбаштыктарга жана эл арасында резонанс жараткан окуяларга жол берилбесин.
Жаш өспүрүмдөрдүн дайынсыз жоголуусу, өспүрүмдөргө байланышкан
кылмыштардын орун алуусуна бөгөт коюу жумуштары күчөтүлсүн. “Милиция өз милдетин аткарган жок” деген сын-пикирлер айтылышына жол бербөө керек. Өздүк курамдын сырткы формалык келбети ирээтке келтирилсин. Коомдук тартипти жана жол коопсуздугун камсыздаган кызматкерлер баардык жарандарга сылык мамиле жасап, тартипти жана мыйзамды бузбай, жүктөлгөн
милдеттерди так аткарышсын. Жер-жердеги баардык жетекчилер жогоруда аталган массалык-маданий иш-чаралар учурунда күчөтүлгөн тартипте иш алып барышсын.
Ички иштер министрлигинин буйругу менен бекитилген иш-мерчемдин
талаптарын сапаттуу аткарып, аталган баардык талаптар күнүмдүк өткөрүлүүчү саптык нускамаларда өздүк курамга жеткирилсин. Кайсы бир аймакта кемчиликтер катталып, кызматкерлер арасында мыйзам бузуу фактылары орун ала турган болсо, анда ошол жердеги жетекчилерге катуу тартиптик чаралар көрүлөөрүн алдын ала эскертемин. Майрам учурунда коомдук тартиптити камсыз кылууга багытталган ИИМ тарабынан жиберилген көрсөтмөлөр кынтыксыз аткарылып, баардык коопсуздук иш чаралар жогорку деңгээлде өткөрүлсүн жана биринчи жетекчилерге толугу менен жоопкерчилик жүктөлөт”,-деди ИИМ башчысы.
Жогоруда аталган маселе боюнча ИИМдин кызматтары менен
башкармалыктарынын жана шаардык жана облустук жетекчилердин ушул багыттагы ишмердүүлүктөрү кеңири талкууланды.