534 Бардыгы /

Административдик-аймактык реформагы ылайык Ош шаардык Кеңешиндеги депутаттардын саны 117ни чапчыды. Мурунку шаардык Кеңештин депутаттарына Кызыл-Кыштак айыл өкмөтүнөн 31 депутат, Төлөйкөн айыл өкмөтүнөн 31 депутат, Нариман айыл өкмөтүнөн жети, Шарк айыл аймагынан үч депутат кошулду.
          Ошентип, Ош шаардык Кеңешинин жаңы курамы алгачкы жолу бүгүн, 20-мартта кезектеги сессиясына чогулду. Отурумга 91 депутат катышып, анда депутаттардын ыйгарым укуктары тууралуу маселе көтөрүлдү. Сессияга катышып жатышкан Борбордук шайлоо комиссиясынын (БШК) өкүлү Тынчтык Шайназаров шаардык кеңештеги жалпы депутаттардын укугу бирдей экендигин эске салды. Анткени, былтыр жүргөн административдик-аймактык реформага ылайык, Ош шаарын айланта курчаган Кара-Суу районундагы бир нече айыл кошулган. Мыйзамга ылйык административдик-аймактык бирдиктердин чек арасы өзгөргөндө, ал жердеги жергиликтүү кеңеш таратылышы керек. Бирок, бул пилоттук долбоор катары жүзөгө ашып жатканына байланыштуу депутаттардын ыйгарым укугу сакталып калган.

          Айтмакчы, Кыргыз Өкмөтү мындай жагдай убактылуу гана экендигин баса белгилеп, жергиликтүү Кеңештердин ишмердигин жана санын аныктаган мыйзам долбоору сунушталаарын билдирген.

Алишер  ТОКСОНБАЕВ, өз кабарчы