585 Бардыгы /

ЫСЫК-КӨЛ. Кечээ, 3-апрелинде Ысык-Көл облусунда ИИМдин ЖКККББнын демилгеси менен жол кырсыктарын алдын алуу жана ага карата тийиштүү иш-чараларды жүргүзүү багытында  жыйын өткөрүлдү.
ЖКККББнын басма сөз кызматы  билдиргендей, жыйынга Кыргыз Республикасынын Президентинин Ысык-Көл облусундагы ыйгарым укуктуу өкүлү  Уланбек Далиев, Кыргыз Республикасынын ИИМдин Жол кыймылынын коопсуздугун камсыздоо башкы башкармалыгынын башчысы Жеңишбек Джоробеков, Ысык-Көл облустук Ички иштер башкармалыгынын, “Унаа” Мамлекеттик агенттигинин, Жол тейлоо мекемелеринин жана айдоочуларды даярдоо мектептеринин жетекчилери катышты.
Жыйында түн ичинде көп катталган өспүрүмдөр, жөө жүргүнчүлөр жана мал-жандыктардын катышуусундагы жол кырсыктарын алдын алуу маселелери каралды. Андан сырткары, түнкүсүн жарык чагылдыруучу каражаттарды иштеп чыгуу, туристтик мезгил учурунда жол  тыгындарына жол бербөө жана эл арасында унаа кырсыктарын алдын алуу боюнча үгүт-насаат иштерин колго алуусу каралды. Айдоочуларды даярдоодо   унаа мектептердин техникалык базаларын жаңыртып, мугалимдердин кесиптик деңгээлин жогорулатуу  багытындагы масалелер көтөрүлүп, аларды чечүүнүн жолдору талкууланды.
ЖКККББнын жетекчиси  жол коопсуздугун жакшыртуу багытында жол кыймылынын коопсуздугун камсыздоо кызматкерлеринин арасында коррупциялык көрүнүштөрдү алдын алуу максатында облус аймагындагы кызматкерлерге боди камераларды берүү каралып жатканын белгиледи.
Андан сырткары Бишкек-Нарын-Балыкчы-Торугарт унаа жолдорунун 137-чакырымынан тартып, Балыкчы шаарына чейин жана Балыкчы-Ананьево-Каракол унаа жолдорунун абалын ЖКККББгы тарабынан изилдөөлөрүнүн натыйжасындагы аныкталган кемчиликтерди тез аранын ичинде аткаруу боюнча жергиликтүү Жол тейлөө мекемелерине тапшырмалар коюлду.
Жыйындын сонунда Кыргыз Республикасынын ИИМдин ЖКККББнын жетекчиси милициянын полковниги Ж. Джоробеков облустагы  жергиликтүү  жол-чарба ишканалардын,  айдоочуларды даярдоочу автомектептер, билим берүү мекемелеринин жол кыймылынын коопсуздугун камсыздоо багытында биргелешип комплекстүү түрдө иш алып баруу сапатын күчөтүп, биргелешкен иш-мерчемдер түзүлүүсүн баса белгиледи. Ушул эле сунушту облустун ыйгарым укуктуу өкүлү У. Далиев колдоо көргөзүп, өз багытында тапшырма берип, жол коопсуздугун камсыз кылууга көмөк көрсөтөрүн кошумчалады.