405 Бардыгы /

Борбордук шайлоо комиссиясы №2-Баткен бир мандаттуу шайлоо округу боюнча Жогорку Кеңештин депутатын мөөнөтүнөн мурда шайлоонун жыйынтыгын акыры чыгарды. БШКдан соңку сааттарда маалымдашкандай, аталган бир мандаттуу шайлоо округунан Кыргыз Республикасынын Жогорку Кеңешинин депутатын мөөнөтүнөн мурда шайлоону болуп өттү деп таануу жөнүндө чечим кабыл алынды. Ушуга улай № -Баткен бир мандаттуу шайлоо округу боюнча Бактияр Алиевич Калпаевди Кыргыз Республикасынын Жогорку Кеңешинин шайланган депутаты деп тааныды.

Баса белгиленгендей, добуш берүүнү уюштуруу үчүн аталган аймакта 81 шайлоо тилкеси түзүлгөн. Шайлоочулардын тизмесине 112 379 шайлоочу киргизилген. ​№2-Баткен шайлоо округу боюнча Жогорку Кеңештин депутатын мөөнөтүнөн мурда шайлоодо Борбордук шайлоо комиссиясы тарабынан 10 талапкер катталган. Мөөнөтүнөн мурда шайлоого 10 талапкер толук катышты. ​Мөөнөтүнөн мурда шайлоону даярдоо жана өткөрүү учурунда 8 арыз жана даттануу түшкөн. ​Бардык келип түшкөн арыздар жана даттануулар каралды жана алар боюнча чечим кабыл алынып, Кыргыз Республикасынын мыйзамдарына ылайык жазуу жүзүндөгү жооптор кайтарылды.

​Борбордук шайлоо комиссиясы Кыргыз Республикасынын Ички иштер министрлигинин, Баткен облустук ички иштер башкармалыгынын жана Баткен облусунун прокуратурасынын өкүлдөрүнүн дагы маалыматын укту. Укук коргоо органдарынын маалыматына караганда, добуш берүүнүн жыйынтыктарына жана мөөнөтүнөн мурда шайлоонун натыйжаларына таасир этүүчү мыйзам бузуулар жана, же мындай бузууларга талапкерлердин катыштыгы бар экендиги жөнүндө материалдар катталган жок.

​Баткен округдук шайлоо комиссиясынын 2024-жылдын 1-майындагы №2-Баткен бир мандаттуу шайлоо округу боюнча КР Жогорку Кеңешинин депутатын мөөнөтүнөн мурда шайлоодо добуш берүүнүн жыйынтыктары жөнүндө протоколуна ылайык, 2024-жылдын 28-апрелинде 28508 шайлоочу добуш берүүгө катышкан, бул округ боюнча шайлоочулардын тизмесине киргендердин 25,30 пайызды түздү.

​Ошентип, талапкерлер шайлоочулардлын төмөнкүдөй добуштарды алышты:

1. Салихов Кеңеш Каримович – 3698 добуш (12,9 пайыз);
   2. Мадалиев Асылбек Алтымышович – 3658 добуш (12,8 пайыз);
   3. Кожонов Замирбек Ырысбаевич – 3614 добуш(12,6 пайыз);
   4. Ойтемиров Махмуд Гиесович – 1848 добуш(6,4 пайыз);
   5. Раимкулов Аширбай Омурзакович – 869 гдобуш (3,0 пайыз);
   6. Нишанбаев Тургунбай – 377 добуш (1,3 пайыз);
   7. Калпаев Бактыяр Алиевич – 11830 добуш(41,4 пайыз);
   8. Каработоев Джалил Исакович – 1180 добуш (4,1 пайыз);
   9. Сатаров Акимали Сатыбалдыевич – 725 добуш (2,5 пайыз);
   10. Шадыманов Бакытбек Адылбекович – 398 добуш (1,4 пайыз);
   11. “Баарына каршы” позициясы үчүн 110 шайлоочу добуш беришти (0,4 пайыз).

Алишер  ТОКСОНБАЕВ, өз кабарчы