606 Бардыгы /

Жалал-Абад облусуна караштуу Аксы районунун айрым аймагында сел жүргөндүгүнө байланыштуу аймакка ушул жылдын 26-майынан тартып Өзгөчө кырдаал режими киргизилди. Бул туурасынла Өзгөчө кырдаалдар министрлигинен билдиришти.  

Анда Кара-Камыш, Сары-Челек, Үч-Коргон Айыл Өөкмөттөрүндө кокту-колоттордон чогулган сел суулар 56 турак жайдын короосун, алты үйдүн жер төлөсүн, төрт турак үйдүн ичине кирип, үч мал сарай урап калгандыгы маалымдалды. Мунун алдында Кезарт айылында сел коркунучунан улам 250 адам коопсуз жайга, тууган-уруктарыныкына убактылуу көчүрүлгөндүгү айтылды.

Өзгөчө кырдаалдар министрлиги үстүбүздөгү  жылдын 25-майында кечки саат 7лер чамасында катуу жааган жаандын кеесепетинен Кара-Жыгач—Кызыл-Көл жолунун 6-чакырымында сел жүргөндүгүн, Кара-Суу дарыясынын деңгээли ого бетер көтөрүлүп, анын жээгине жакын жашаган 60тан ашык үйдү суу каптоо коркунучу жаралгандыгын кабарлаган.

Ушул тапта селдин кесепетин жоюу, кырсыктын алдын алуу иштери абдан кызуу жүрүп жатат. Жеринде Өзгөчө кырдаалдар министринин орун басары, президенттин Жалал-Абад облусундлагы ыйгарым укуктуу Өкүлү баштаган топ кыдырып жүрүшөт. Кыргызстанда быйылкы жаз абдан жаанчыл болуп, бир катар облустарда, аймактарда сел жүрүп, дарыялар, суулар ташкындап жаткан чагы.

Алишер ТОСКОНБАЕВ, өз кабарчы