390 Бардыгы /

Кыргызстандын Түштүк башкалаасында 2010-жылкы июнь коогалаңында курман болгондорду эскерүү иш-чарасы өткөрүлдү.  Бул туурасында президенттин Ош облусундагы Өкүлчүлүгүнөн билдиришти.

Маалыматка караганда, аталган иш-чарага катышышкан президенттнин Ош облусундагы Өкүлүнүн орун басары Талантбек Арстанкулов жана жергиликтүү бийлик өкүлдөрү курман болгондордун элесине таазим кылышты. Буга улай Ош облустук бийлигинин өкүлү Талантбек Арстанкулов каза тапкандардын жакындарына жана иш-чаранын катышуучуларына көңүл айтты.

– Ар бирибиз тынчтыкты жана ынтымакты сактоого милдеттүүбүз! – деп баса белгиледи Ош облусундагы Өкүлүнүн орун басары Талантбек Арстанкулов. – Анткени, биз – эчендеген кылымдар бою ынтымакта, бир туугандыкта жашаган көп улуттуу элбиз. Ата-бабаларыбыз ынтымакты туу тутуп, байыркы Ош шаарынын даңктуу тарыхын жараткан.

Айтмакчы, аталган эскерүү Ош шаарындагы «Энелердин көз жашы» мемориалдык комплексине гүл коюу менен башталып, каза тапкандарга багышталып куран дагы окулду.

Алишер ТОСКОНБАЕВ, өз кабарчы