438 Бардыгы /

Кыргыз Республикасынын Ош шаарынын мэри Бакытбек Жетигенов Орусиянын боордош шаары Санкт-Петербург калаасынын санариптештирүү боюнча адистеринен куралган атайын топ менен жолугушту.

Ошентип, аталган расмий жолугушуунун жүрүшүндө Санкт-Петербургдан келишкен коноктор маалыматтык технологияларды, нейрондук тармактарды жана видеоаналитика системаларын шаар аймагында, коопсуздук, транспорт тармагын жөнгө салуу жаатында кырдаалдык-мониторинг борборунун ишмердүүлүгүн колдонуу туурасында кенен-чонон маалымат беришти. Мындан тышкары шаар тургундары жана коноктору үчүн маанилүү болгон маалыматты жайылтуу үчүн чатбот-платформаларды жана роботтордун ишин киргизүүнүн маанилүүлүгү, өзгөчө кырдаалдар учурунда маалыматты ыкчам билдирүү, ЖМКларга жана социалдык тармактарга үзгүлтүксүз мониторинг жүргүзүү, тиешелүү кызматтар менен уюмдардын өз ара аракеттенүүсү, атайын шашылыш кызматтарды чакыруу өңдөнгөн долбоорлору боюнча дагы ой-пикир алмашышты.

 Коноктор муну менен катар шаардагы бир катар мунципалдык ишканалардын жана кызматтардын ишмердүүлүгү менен дагы жеринде таанышып, Ош шаарында санариптештирүү боюнча бир катар пилоттук долбоорлорду жүзөгө ашыруу планын ачык-айкын талкуулашты. Белгилей кетчү жагдай: Орусиянын Санкт-Петербург шаары санариптештирүү багытында 20 жылдык тажрыйбасы бар. Шаарда жүздөн ашык маалымат системасы иштейт. Мындан сырткары Араб жана Азия өлкөлөрүнө тажрыйба жана технологиялык долбоорлорду жүзөгө ашыруу жагынан бир топ тажрыйбага дагы ээ.

Алишер ТОКСОНБАЕВ, өз кабарчы