348 Бардыгы /

Кыргыз Республикасынын Президентинин Баткен облусундагы ыйгарым укуктуу өкүлү Абдыкарим Алимбаев Корея Эл аралык кызматташтык агенттигинин (KOICA) өкүлү Эн-Вуг Чой жана БУУнун Өнүктүрүү Программасынын (БУУӨПтүн) өкүлү Джихеа Ким менен жолугушту.

Кыргыз Республикасынын Президентинин Баткен облусундагы ыйгарым укуктуу Өкүлчүлүгүнөн маалымдашкандай, аталган уюмдар менен Баткен облусунун ортосунда «Баткен облусунун климатка туруктуу айыл чарбасы үчүн жергиликтүү аракеттер жана маалыматка негизделген суу ресурстарын комплекстүү башкаруу» долбоору жүзөгө ашырылууда. Буга дейре аталган долбоордун концепциясы жана алдын ала техникалык-экономикалык негиздемеси иштелип чыккан. Беш жылда ишке ашыруу көздөлүп жаткан бул чоң долбоордун жалпы баасы 50 миллион долларды чапчыйт.

– Биз БУУӨП жана KOICA менен болгон мамилебизди жогору баалайбыз! Сиздер менен тыгыз кызматташуу маселелерин талкуулоого дайыма ынтызарбыз! Бул долбоорлор биз үчүн өтө маанилүү. Анткени Баткен облусу – агрардык аймак. Ошондуктан, суу – биздин эң башкы байлыгыбыз. Аны мезгил талабына жараша гана сарамжал пайдалануу абдан маанилүү! – деген Кыргыз Республикасынын Президентинин Баткен облусундагы ыйгарым укуктуу өкүлү Абдыкарим Алимбаев аталган долбоор дагы болочокто өз жемишин берээрине абдан ишендирди.

Ошондой эле тараптар алдыда пландаштырылган сууну туура бөлүштүрүү менен максаттуу пайдалануу аракеттери климаттын жылуулануу тенденциясынан улам rusbank, кургакчылыктын кесепети болгон сугат суунун олуттуу тартыштыгын алдын алууда зор өбөлгө болоорун дагы баса белгилешти.

Кыскасы, «Баткен облусунун климатка туруктуу айыл чарбасы үчүн жергиликтүү аракеттер жана маалыматка негизделген суу ресурстарын комплекстүү башкаруу» долбооруна Баткен облусунун Баткен, Кадамжай жана Лейлек районунун бир катар айыл өкмөттөрү пилоттук негизде гана тандалган. Бул долбоордун алкагында аталган аймактарда суу таңкыстыгы көйгөйүн жеңилдетүү маселелерине өзгөчө көңүл бурулмакчы. Сууну сарамажалдуу  пайдалануу, а түгүл тамчылатып сугаруу ыкмасын жайылтуу жана дагы суу жетпеген дың жерлерди катарынан өздөштүрүү дагы катуу каралууда.

Алишер ТОКСОНБАЕВ, өз кабарчы