138 Бардыгы /

        Ош  жергесиндеги таанымал ишкер, милициянын отставкадагы полковниги Жалил Атамбаев менен Жогорку Кеңештин мурунку депутаты Салайдин Айдаров уюшкан кылмыш топторун каржылоого шек саналып камакка алынышты.

Айрым маалыматтарга караганда, булардын үстүнөн Улуттук коопсуздук комитети (УКМК) «Салимбай байбача» деген каймана ат менен таанымал өзбекстандык кримавторитет жана олигарх Салим Абдувалиевге байланыштуу кылмыш ишин козгогон. Өткөн аптада Кыргызстандын атайын кызматы «Салимбай байбачага» эл аралык издөө жарыялаган жана анын былтыр октябрда атайын операцияда жок кылынган кыргызстандык кримтөбөл Камчы Көлбаев менен чогуу түшкөн сүрөттөрүн дагы тараткан.

Баса, Жалил Атамбаев менен Салайдин Айдаровго Кылмыш-Жаза Кодексинин 263-беренеси («Уюшкан топторду жана кылмыштуу коомдоштуктарды каржылоо») менен кылмыш иши козголгону эми гана ачыкталды. Ошентип, кармалган экөө тең дароо камакка алынып, Атамбаев 4-сентябрга чейин Бишкек шаарындагы №1-тергөө абагына, ал эми Айдаров УКМКнын тергөө абагына калтырылгандыгы ырасталды. УКМК бул иштердин чоо-жайы тууралуу азырынча толук кандуу маалымат тарата элек.

Алишер ТОКСОНБАЕВ, өз кабарчы