165 Бардыгы /

Кыргыз Республикасынын УКМКсына караштуу Мамлекеттик Чек ара кызматынын маалымат жана коммуникация башкармалыгы Кыргыз Республикасынын УКМКсынын Чек ара кызматынын куралдануусунда турган учкучсуз учуучу чалгындоочу жана сокку уруучу аппараттар, булардын катарында Bayraktar дагы ордунда экендигин, эч кандай зыянга учурабагандыгын маалымдады.

Учкучсуз учуучу аппараттардын экипаждары коюлган тапшырмаларды толук кандуу аткарууга даяр турушат. Кечээ, 2024-жылдын 14-августунда, Балыкчы шаарынын аймагындагы ок атуу талаасында тактикалык мини-дрондун жаңы түрүн окуу сынагынан  өткөрүү учурунда аталган жабдык Ысык-Көл облусундагы Тамчы аэропортуна коноор алдында кулап түшүп, күйүп дагы кетип, алдын ала  аныкталган чекитке таптакыр жетпей  калган. Бактыга жараша  мини-дрон кулап түшкөндө, эч ким жабыркаган эмес!

Буга дейре Ысык-Көл районунун Тамчы айылындагы аэропортко жакын жерде учкучсуз учак кулаганы маалымдалган. Аймак курчоого алынып, окуя болгон жерге эч кимди жакындаткан эмес. Ушул тапта аталган аэропорттун аймагы мини-дрондун жабыркаган бөлүкчөлөрүнөн толук бойдон тазаланууда. Сынак өткөргөн топ ошондой эле мини-дрондун кулап түшүү себептерин тыкыр аныктоодо. Белгилей кетчүү жагдай: Байрактар ​​учкучсуз учактары бул аймакта буга чейин көп жолу көрүлгөн.

        Алишер ТОКСОНБАЕВ, өз кабарчы