162 Бардыгы /

Кыргызстандын Түштүк жергесиндеги «Казарман», «Жалал-Абад» жана «Кербен» аймактык аэропорттору жаңыдан сатылып алынган учактар менен каттамдарды кабыл алууга дапдаяр! Бул туурасында «Манас» Эл аралык аэропртунун басма сөз кызматынан билдиришти.

Аэропорттун басма сөз кызматы биринчи учак ушул жылдын сентябрында келээри жана анда биринчи ички каттам дагы пландалып жаткандыгын кошумчалады. «Манас» Эл аралык аэропорту» ААКтын башкармалыгынын төрагасы Манасбек Самидинов Кыргыз Республикасынын Жарандык авиациясынын директору Данияр Бостонов менен биргеликте «Казарман», «Караван» жана «Жалал-Абад» аймактык аэропортторунун ишке киргизүүгө даярдыгын жеринде тыкыр текшерди.

– Бүгүн биз аталган аэропорттордун коопсуз жана натыйжалуу иштөөсү үчүн аэронавигациялык бардык стандарттарды сактоого даярдыгын кылдат талдап чыктык. Текшерүүнүн максаты өткөн жылы сатылып алынган жаңы учактарды расмий ишке киргизүүгө даярдык көрүү болуп саналат, — деди «Манас» Эл аралык аэропорту» ААКтын башкармалыгынын төрагасы Манасбек Самидинов. – Жакын арада башкармалыктын «Асман Эйрлайнс» туунду авиакомпаниясынын учактарынын келиши күтүлүүдө жана биз жергиликтүү багыттарга каттамдарды баштоону дыкаат пландап жатабыз. Ошентип, Кыргыз Республикасынын Жарандык авиациясы алгылыктуу өзгөрүүлөрдун алдында турат.

«Манас» Эл аралык аэропорту» ААКтын башкармалыгынын төрагасы Манасбек Самидинов сөз соңунда баса белгилегендей, «Казарман» аэропортунда терминалы заманбап жасалгаланып, учуп-конуу тилкеси бүтүндөй жаңыртылды. Ошондой эле «Кербен» аэропортунун рулеждук жолчолору жана учуп-конуу тилкелери толугу менен жаңыртылды. Ал эми «Жалал-Абад» аэропортунда 2024-жылы учуп-конуу тилкеси толугу менен алмаштырылды.

Алишер ТОКСОНБАЕВ, өз кабарчы