246 Бардыгы /

        Ош облусуна караштуу Чоң-Алай районунун Бурган-Суу айылында Ооганстандын Кичи жана Чоң Памиринен көчүрүлгөн  этникалык кыргыздарга курулуп жаткан жеке турак үйлөрдүн курулушу дээрлик бүткөрүлдү. Бул туурасында Кыргыз Республикасынын Архитектура, курулуш жана турак жай-коммуналдык чарба мамлекеттик агенттигинен билдиришти.

        Маалыматка караганда, аталган үйлөрдүн ачкычын Кыргызстандын эгемендүүлүк майрамын утурлай тапшыруу пландаштырылууда. Бул обьекттин курулушу 2023-жылы республикалык бюджеттин эсебинен башталган. Тендердик баасы 82,9 миллион сомду түзөт. Курулуш-монтаждоо иштери «Олимп и Ко» ЖЧКсы тарабынан жүргүзүлүүдө.

        Ошентип, долбоор боюнча Чоң-Алай районунун Бурган-Суу айылындагы турак үйлөр эки үй-бүлөгө ылайыкталган, жалпысынан 6 бөлмөлүү 10 турак үй курулду. Үйдүн аянты 180 чарчы метрди түзөт. Бүгүнкү күндө турак үйлөрдүн курулуш жумуштары дээрлик 95 пайызга бүткөрүлүп, ушул тапта тышкы  ажатканалардын курулушу улантылууда.

Алишер ТОКСОНБАЕВ, өз кабарчы