63 Бардыгы /

        Баткен облусунун түптөлгөндүгүнүн 25 жылдыгына карата 25 обьектинин ачылып, анан дагы ипотекалык үйдүн курулушуна капсула салынат. Мааракеге байланыштуу Баткен шаарында инвестициялык форум уюштурулуп, илимий конференция дагы өткөрүлөт.

Баса, Баткен облусун түзүү чечими 1999-жылдын 13-октябрында кабыл алынган. 380 миңден ашыгыраак калк жашаган, курамына Кызыл-Кыя, Сүлүктү шаары, Кадамжай, Баткен Лейлек райондору кирген. Ушул тапта облуста дээрлик 580 миңден ашык калкы жашайт. Баткен эки өлкө менен чектешип, айрым тилкелер тактала электиги үчүн аймакта коопсуздук маселеси дагыле курч бойдон. Кыргызстан менен Тажикстан 2002-жылдары чек араны аныктоо боюнча жумуштарын баштаганы менен 10-15 жыл бою жарытаарлык иш жүргөн жок!

Убакыттын улам өтүшү менен шарттуу чек аранын айланасында талаштуу участоктор, стратегиялык аймактар үчүн таасир талаш күчөп, 2014-жылдан баштап чек арадагы тирешүүлөр курал колдонуу менен коштоло баштаган.

Ошентип, жыл сайын чек арадагы майда-барат тирешүүлөрдүн 50дөн ашык учуру катталды. 2021-2022-жылдары катары менен куралдуу кагылышуу жүз берип, эки тараптан эки жүздөй киши каза тапты. Бул окуялардан кийин Кыргызстан менен Тажикстандын чек араны тактоо иштери активдешип, акыркы учурга расмий маалымат боюнча 970 чакырымдан ашыгыраак чек аранын 50-55 чакырымдай тактала элек тилкеси калгандыгы айтылды.

Алишер ТОКСОНБАЕВ, өз кабарчы