9 Бардыгы /

Кечээ, 28-декабрда Кыргыз Республикасынын Президенти Садыр Жапаров жана Биринчи айым Айгүл Жапарова Токтогул Сатылганов атындагы Кыргыз улуттук филармонияда салтка айланган балдар үчүн жаңы жылдык балаты майрамына катышты.

Иш-чарага республиканын бардык аймактарынан 1100 бала чакырылды, алардын арасында окуунун мыктылары, олимпиадалардын, эл аралык сынактардын жана турнирлердин жеңүүчүлөрү, балдар үйлөрүнүн тарбиялануучулары, кызмат учурунда каза болгон укук коргоо органдарынын жана аскер кызматкерлеринин балдары, аз камсыз болгон үй-бүлөлөрдүн балдары, ошондой эле ден соолугунун мүмкүнчүлүгү чектелген балдар жана башкалар бар.

Балдар үчүн бий ийримдеринин тарбиялануучулары тарабынан даярдалган “Алтын казык” аттуу театрлаштырылган жаңы жылдык музыкалык спектакль тартууланды. Жаш көрүүчүлөргө “Мекениме болгон сүйүү” аттуу сахналаштырылган оюн көрсөтүлдү.

Эске сала кетсек, былтыркы жаңы жылдык спектакль жаратылыш темасына арналган болчу.

Ошондой эле жаңы жылдык майрамдын меймандары үчүн Кыргызстанды дүйнөлүк деңгээлде даңазалаган “D Billions” музыкалык тобу чыгармаларын аткарды.

Андан кийин Президент Садыр Жапаров салтанаттын катышуучуларын куттуктап, келе жаткан Жаңы жылда ийгиликтерди, көксөгөн тилектердин орундалышын, өздөрүнө болгон ишенимди, жаңы идеяларды жана чоң жеңиштерди каалады.

“Менин кичинекей досторум, өлкөбүздү өнүктүрүш үчүн, Кыргызстанды даңктап-даңазалап, кызыл желегибизди бийик желбиретиш үчүн эң биринчи кезекте мектепти жалаң “5” деген бааларга окушуңар керек. Агай-эжейлердин сабакта айткандарын кунт коюп угуп, берген тапшырмаларын так аткарып, билимиңерди көбөйтүп, акылыңарды арттырышыңар кажет”, – деп Мамлекет башчысы балдарга акыл-насаатын айтты.

“Силер дагы, чоң кишилер – биз дагы Жаңы жылды изги үмүт-тилек менен күтөбүз. Жүрөгүбүздүн түпкүрүнө каткан жылуу сөздөрдү айтып, кубануу менен тособуз”, – деди Президент.

Аягында балдарга Президент Садыр Жапаровдун атынан белектер тапшырылды.

WWW.