42 Бардыгы /

БАТКЕНДЕ МУНИЦИПАЛДЫК КЫЗМАТ КӨРСӨТҮҮЛӨР САНАРИПТЕШТИРИЛИП ЖАТАТ

Баткен облусунда муниципалдык кызмат көрсөтүүлөр санариптештирилип жаткан чагы. Бул туурасында Президенттин аймактагы өкүлчүлүгүнөн маалымдашты.

Бүгүн өлкөнү санариптештирүү программасынын алкагында президенттин Баткен облусундагы өкүлчүлүгүнүн аппараты менен БУУнун Өнүктүрүү Программасынын кызматташуусунун натыйжасында облустагы муниципалдык ишканаларга техникалар тапшырылды. Президенттин Баткен облусундагы өкүлүнүн орун басары Тимур Мадияров БУУнун техникалык колдоосу санариптештирүүнү илгерилетүүгө жана кызмат көрсөтүүнүн сапатын жакшыртууга гана жардам берээрин шардана кылды.

Бүгүнкү күндө аймакта санарип системалар толук кандуу ишке киргизилип, алгачкы оң натыйжаларын көрсөтө баштады. Буга мисал сыңары Раззаков шаарынын «Исфана таза суу» муниципалдык ишканасынын «билинг» системасын ишке ашыруудагы тажрыйба жана натыйжалар көрсөтүлдү.

Ушул тапта долбоорго Баткен облусунун 2 шаар, 5 айыл аймагы киргизилген. Аларда таштанды чыгаруу, ичүүчү суу, сугат суу жана башка кызматтар үчүн төлөмдөрдү кабыл алууда электрондук ыкмаларды колдонуу акттивдүү колго алынууда.

Алишер ТОКСОНБАЕВ, өз кабарчы