45 Бардыгы /

Президент Садыр Жапаров кол койгон жарлыкка ылайык, Жогорку Кеңештин депутаты Жеңишбек Токторбаев Ош шаарынын мэрлигине дайындалды. Бул туурасында Президенттин басма сөз кызматынан кабарлашты.

Ал эми мамлекет башчынын дагы бир жарлыгы менен Бакытбек Жетигенов Ош шаарынын мэрлигинен бошотулуп, Президенттин Ысык-Көл облусундагы ыйгарым укуктуу өкүлү болуп дайындалды. 57 жаштагы Бакытбек Жетигенов Ош шаарынын мэри болуп 2022-жылы 29-ноябрда дайындалган. Ага чейин ал «Бийликти басып алуу беренеси» менен камалып чыккан эле. Ошондуктан Жетигеновдун бул кызматка барышы күтүүсүз кадрдык жүрүш катары бааланган.

Улуттук коопсуздук боюнча мамлекеттик комитет (УКМК) 2021-жылы парламенттик шайлоонун алдында 26-ноябрда «Бийликти күч менен басып алууга даярданган» деген күмөн менен «Чүй ынтымагы» жана «Эл ынтымагы» биримдиктеринин он бештей өкүлүн кармаган. Алардын арасында ошол кездеги 6-чакырылыштын депутаты Бакытбек Жетигенов дагы бар эле.

Алишер ТОКСОНБАЕВ, өз кабарчы