6 Бардыгы /

Ош облусуна караштуу Өзгөн шаарынын борбордук аянтында Айкөл Манастын айкели ачылды. Бул туурасында Президенттин Ош облусундагы Өкүлчүлүгүнөн билдиришти.

Салтанаттуу иш-чарага Президенттин Ош облусундагы Өкүлү Элчибек Жантаев, Жогорку Кеңештин депутаты Улукбек Ормонов, Кыргыз Эл артисти Жолболду Алыбаев, ардагерлер, район жетекчилиги, белгилүү манасчылар, төкмө акындар жана жергиликтүү тургундар катышышты.

Президенттин Ош облусундагы Өкүлү Элчибек Жантаев аземде сөз сүйлөп, аба ырайына байланыштуу келе албай калган мамлекеттик катчы Сүйүнбек Касмамбетовдун саламын дагы кошо жеткирди. Ошондой эле облус жетекчиси байыртадан Улуу Жибек жолунун чордонуна айланган, бай тарыхы бар, эли эмгекчил Өзгөн жергесинде Манас атанын айкелинин ачылышы элибизди мындан ары да мекенчилдикке, бийиктиктерге үндөп тураарын баса белгиледи.

Өзгөн шаарынын борборунда жайланышкан Айкөл Манастын эстелигин жана анын жайгашкан жерин капиталдык оңдоп-түзөөдөн өткөрүү иштери Ош облусунун башчысы Элчибек Жантаевдин демилгеси аркасында былтыр башталып, ошол эле жылы аяктаган. Ал үчүн жергиликтүү бюджеттен 2 миллион 185 миң сом бөлүнгөн. Ал эми айкелди жезден жасоо үчүн Ош облустук өнүктүрүү фондунан 3 милион сом, жергиликтүү бюджеттен 100 миң 823 сом каржыланып, жумуш толук аткарылып бүткөрүлдү. Белгилей кетээрибиз: Манастын эстелигинин бийиктиги 3 метр 65 см, туурасы 1 метр 60 см.

Алишер ТОКСОНБАЕВ, өз кабарчы