36 Бардыгы /

Бүгүн, Сузак районунун Достук айылында жайгашкан “Мега Юнион Индастри” жоопкерчилиги чектелген коомунун гипс жана гипсокартон чыгаруучу ишканасынын кошумча жаңы линиясы курула баштады.

Капсула салуу иш-чарасына Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, Кыргыз Республикасынын Экономика жана коммерция министринин орун басары Искендер Асылкулов, Кытайлык инвесторлор жана мекеме жетекчилиги катышты.

Өткөн жылдын декабрь айында “Мега Юнион Индастри” ЖЧКсы менен Кытайдын “Hengshui Decheng Machinery & Equipment Co., Ltd” компаниясынын ортосунда кызматташуу боюнча Меморандумга кол коюлган.

Ага ылайык, гипс жана гипсокартон чыгаруучу ишкананын өндүрүшүн кеңейтүү жумуштары башталып, 2025-жылдын сентябрь айында колдонууга берүү пландалган. Жумуш аяктаса жаӊы технологиялык гипсокартон чыгаруучу линия жылына 60 миң тонна гипс жана 10 млн метр чарчы гипсокартон өндүрүү кубаттуулугуна ээ болот. Ага сарпталуучу жалпы инвестициянын көлөмү 10,0 млн. АКШ долларын түзөт.

Облус башчысы Тилек Текебаев, заводду кеңейтүү жумуштарынын башталышы маанилүү окуялардын бири экенин белгиледи. Алдыдагы убкатта завод жалпы өлкө боюнча керектөөлөрдү камсыздап, жаңы жумуш орундарын пайда кылып, экономикалык өсүүнү шарттарын кошумчалады.

Белгилей кетсек, “Мега Юнион Индастри” жоопкерчилиги чектелген коому Сузак районунун Достук айылында 2008-жылдан тарта иш алып барып келет.