33 Бардыгы /

Ош облустук соту Ош шаардык мэриясынын муниципалдык менчик башкармалыгынын мурунку башчысы Алтынбек Пирматовду күнөөлүү деп таап, аны 1 миллион сом айыпка жакты. Бул туурасында Ош облустук соттун басма сөз кызматынан билдиришти.

Ошентип. соттун чечимине ылайык, Алтынбек Пирматов Кылмыш-Жаза Кодексинин 337-беренесинин «Кызмат абалын кыянаттык менен пайдалануу» 3-бөлүгү менен күнөөлүү деп табылып, эч жакка кетпөө тилкатынын негизинде абактан бошотулду. Улуттук коопсуздук мамлекеттик комитети Пирматовду кызмат абалынан кыянаттык менен пайдаланган деп айыптап, былтыр 2-декабрда кармап, анан камаган эле. Тергөөнүн маалыматына караганда, ал буга чейин Ош шаарындагы Туран кичи районунда сел суусу агып түшчү каналга бөлүнгөн 2,2 гектар жерди дагы мыйзамсыз берүүгө көмөктөшкөндүгү баса белгиленген. Тагыраагы, А. Пирматов Ош шаардык Кеңешинин мурдагы депутаты И.А.Шга сел сууларын агызуучу каналдын жер тилкесин жеке менчикке берүү үчүн жасалма аукционду уюштурууга көмөктөшкөндүгү аныкталган.

Бирок, Ош шаардык мэриясынын муниципалдык менчик башкармалыгынын мурунку башчысы Алтынбек өзү жана анын жактоочусу, ошондой эле жакындары бул туурасында комментарий берише элек.

Эскерте кетчүү жагдай: буга чейин аталган кылмыш иши боюнча Ош шаарынын экс-вице-мэри Ж.М.Азимов, Ош аймактык шаар куруу жана архитектура башкармалыгынын экс-башчысы А.А.Токошев, Ош шаарынын мэриясынын ММБ экс-башчысы А.Э.Семетеев жана «Кадастр» мамлекеттик ишканасынын Ош филиалынын экс-башчысы И.Б.Сансызбаев кылмыш жоопкерчилигине тартылышкан. Былтыр 14-июлда катуу жаандан кийин Ак-Буура дарыясы катуу кирген. Андан соң кыян жүрүп, Оштогу борбордук базарды, ошондой эле анын чет жакасындагы айылдарды кошо сел каптаган. Беш киши каза таап, бир нече машинени сел агызып, үйлөр жана көпүрөлөр, мындан тышкары жолдор жарактан чыккан. Соодагерлер деле чоң чыгымга учураган. Ошто жана Кара-Суу районунда жүздөгөн турак жайлар зыян тарткан.

Алишер ТОКСОНБАЕВ, өз кабарчы