18 Бардыгы /

Жогорку Кеңеш депутаты Жанарбек Акаев окуучуларды  ташуу максатында мектептерге таратылган автобустар алыскы айылдарда таптакыр эле иштетилбей тургандыгын айтып, Кыргыз бийлигин бийлигин жоопкерсиздиги үчүн  кескин түрдө сындады. Депутат бул маселени парламенттин отурумунда дагы көтөрдү.

– Мен жакында Ош облусунун Алай, Чоң-Алай жана Кара-Суу райондорунун эң алыскы айылдарын өзүмчө кыдырып кайттым. Шайлоочулар менен жолугушуу маалында Орусиянын жардамы аркасында мектеп окуучуларын гана ташууга таратылган автобустар эмдигиче иштебей тургандыгын айтышып, ыраса даттанышты. Бир топ кыштактарда ал автобустар жөн эле турат экен. Айдоочуга штат каралган эмес дешти. Бул маселени кантип чечүүгө болот? – деп тызылдады Эл өкүлү Жанарбек Акаев.

Депутаттын суроосуна билим берүү жана илим министри Догдуркүл Кендирбаева жооп кайтарып, айтылган автобустар айыл өкмөттөрүнүн балансына өткөрүлүп берилгендигин баса белгилеп, андан ары каржылоо жана айдоочу менен камсыздоо дагы алардын мойнунда экендигин дагы жар салды.

Баш кеңсеси Орусияда жайгашкан «ЕврАзия» автономдуу коомерциялык эмес уюму Кыргызстанга белек сыёары тартуулаган 100 автобус былтыр ноябрь айынын аягында алыскы аймактардагы мектептерге таратылгандыгы кабарланган. Улуттук инвестиция агенттиги автобустар жергиликтүү мамлекеттик администрациялардын жана жергиликтүү өз алдынча башкаруу органдарынын балансына өткөрүлүп берилгендигин дагы кошумчалаган. Баса, мектеп окуучулары үчүн автобустар алыскы айылдардагы окуучуларды мектепке жеткирүү максатында, шарты катаал, мектепке жетүүгө жолу татаал алыскы аймактарда жашаган балдардын билим алуу мүмкүнчүлүгүн кыйла жакшыртуу максатында алынгандыгы айтылган.

Алишер ТОКСОНБАЕВ, өз кабарчы