Аймак

КЫРГЫЗСТАНДЫН 960 АЙЫЛЫНДА ТАЗА СУУ ЖОК!

КЫРГЫЗСТАНДЫН 960 АЙЫЛЫНДА ТАЗА СУУ ЖОК!

 3 Бардыгы /

Ушул тапта Кыргызстандагы 960 айылында дагыле таза суу жок! Бул кыштактарга таза суу жеткирүү максатында 1 миллиард доллар керек. Бул туурасында Министрлер Кабинетинин Төрагасынын орун басары жана суу ресурстары, айыл чарба жана кайра иштетүүчү өнөр жайы министри Бакыт Төрөбаев шардана кылды.

Кыргыз Өкмөтүнүн мүчөсү Бакыт Төрөбаевдин айтымында, 1 миллиард доллардын 800 миллион доллары таза сууга, 200 миллион доллары саркынды суу үчүн гана керек

– Ушул тапта биз 168 айылда долбоорлоо жана курулуш иштерин абдан кызуу жүргүзүп жатабыз. Быйыл 40 айылды таза суу менен камсыз этебиз! – деди Министрлер кабинетинин төрагасынын орун басары жана суу ресурстары, айыл чарба жана кайра иштетүүчү өнөр жайы министри Бакыт Төрөбаев.

Бирок, Кыргыз Өкмөтүнүн мүчөсү каражаттын булагын такыр ачыктаган жок. Анткени, таза суу – өлкөбүздөгү эё олуттуу көйгөйлөрдүн бири. Айрыкча ичилүүчү суунун тартыштыгы аймактарда абдан курч. Ичкенге таза суу жеткиликтүү болбогон айылдарда күз мезгилинде ичеги-карын ооруларына, жугуштуу илдеттерге байланыштуу маселелер дагыле жаралып келатат.

Айтмакчы, Суу ресурстары, айыл чарба жана кайра иштетүүчү өнөр жайы министрлиги былтыр жайында берген маалыматында, Кыргызстандагы 1906 айылдын 637си гана таза суу менен камсыз этилгендиги айтылган. Дагы 1071 айылга жакын арада ичилүүчү суу киргизүү зарылчылыгы бар. Мекеме ошондой эле ушул тапта өлкө боюнча 260 айылга таза суу тартуу программасы иштеп жаткандыгын маалымдаган.

Баса, 2011-жылы республиканын жүздөгөн айылдарын таза суу менен камсыздоо максатында «Таза суу» долбоору ишке киргизилип, бирок, 2023-жылы Азия өнүктүрүү банкы бул долбоорду каржылоону токтоткон. Долбоор болжол менен 20 миллион долларды түзгөн. Ал эми төрт жыл мурун Кыргыз бийлиги 2023-жылга чейин өлкөбүздүн калкын таза суу менен толук камсыз кылууга катуу убада берген.

Алишер ТОКСОНБАЕВ, өз кабарчы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17