24 Бардыгы /

Быйыл Ош облусу боюнча жалпы жонунан 81 даана 220/110/35/10-6 кВ көмөк чордону оңдоп-түзөөдөн өткөрүлөт. Энергетика министрлигинен билдиришкендей, бул жараян облус боюнча электр энергиясы менен камсыздоонун сапатын жогорулатууга гана багытталат.

Жогорку чыңалуудагы көмөк чордондор кызматы «Түштүк» тайпасы Ош, Кара-Суу, Алай жана Чоң-Алай райондорунунда жайланышкан 23 көмөк чордондо ремонт иштерин жүргүзөт.  Ал эми Кара-Суу тайпасы тарабынан Өзгөн жана Кара-Кулжа райондорунун аймагындагы 27 көмөк чордондо ремонт иштери жүргүзүлөт. Ошондой эле Манас-Ата тайпасы тарабынан быйылкы жылы Ош, Кара-Суу, Араван жана Ноокат райондорунда жайгашкан 28 көмөк чордондордо капиталдык ремонт жасалат. Ушуга улай Ош тайпасы Ноокат, Араван райондорундагы жана Ош шаарындагы 14 көмөк чордондорду оңдоп-түзөөдөн өткөрөт.

Белгилей кетчүү жагдай: 2025-2026-жылдагы күз-кыш мезгилине карата пландалган иштер белгиленген графикке ылайык, ушул жылдын март айынан тарта ноябрь айына чейин жүргүзүлөт. Ремонт иштерине керектелүүчү жабдыктар «КУЭТ» ААК тарабынан каржыланат. Ошондуктан, жергиликтүү тургундарга убактылуу өчүрүүлөр боюнча www.oshpes.kg сайтынан алдын ала маалымат берилип, оңдоо иштеринин мөөнөттөрү тууралуу кабардар кылынат.

Алишер ТОКСОНБАЕВ, өз кабарчы