24 Бардыгы /

ОшМУнун Тоо экосистемаларын сактоо жана жашыл инновациялар Консалтинг борборунун директору Абдыжапар Аккулов Жогорку Кеңештин «Альянс» фракциясынын атайын жыйынына катышты. Сессияда ал окуу жай USAID жана «Ага Хан» фонддору менен биргеликте аткарып жаткан «Курбу-Таш токой» долбоору жөнүндө кеңири маалымат берип, тажрыйбасы менен дагы тең бөлүштү.

Ош мамлекеттик университетинин окутуучулары жана студенттери 2017-жылдын апрель-май айларында Өзгөн районундагы Курбу-Таш айылын басып калган жер көчкүнүн ордунда токой-чарбалык жана биорекультивациялык илимий-изилдөө  жүргүзгөн. Жыйынтыгында «Курбу-Таш токой» илимий-өндүрүштүк долбоору иштелип чыгарылган. 100 гектар жер аянты тосмого алынып, ушул тапта мунун 50 гектарына жакынына түрдүү бак-дарактар менен бадалдардын көчөттөрү отургузулуп, алар ырааттуу өстүрүлүп жатат.

Айтмакчы, Жогорку Кеңештин «Альянс» фракциясынын атайын жыйынына өлкө аймагындагы мөңгүлөрдүн ал-акыбалы жана аларды туруктуу сактоо, ошондой эле экологиялык туруктуулукту камсыз кылуу багытындагы маселелер дагы дыкаат каралды.

Алишер ТОКСОНБАЕВ, өз кабарчы