3 Бардыгы /

Ош облусунун Алай районунда мамлекеттик дарыкананын 455 чарчы метр имараты жана 0,15 сотых жер тилкеси акыры мамлекеттин балансына кайтарылды. Бул тууралуу Улуттук коопсуздук мамлекеттик комитетинен билдиришти.

Баса, УКМК шаарлардын жана райондук борборлордун мурда мыйзамсыз түрдө жеке менчикке чыгарылган инфратүзүмдүк обьектилерин мамлекеттик менчикке кайтаруу жаатында иш-чаралардын алкагында Алай районунун Гүлчө айылы Өкмөтүнүн аймагында жайланышкан Саламаттык сактоо министрлигине таандык болгон, 455 чарчы метр аянты, 0,15 сотых жер тилкеси менен мамлекеттик дарыкананын имараты убагында Кыргыз Республикасынын мыйзамдарын бузуу менен менчиктештирилип кеткендиги аныкталды.

Ошентип, бул факт боюнча сотко чейинки өндүрүштүн алкагында тиешелүү иш-чаралар жүргүзүлүп, натыйжада жогоруда аталган имарат жер тилкеси менен кошо мамлекеттин балансына ыктыярдуу тартипте кайтарылды. Кыскасы, мыйзамсыз менчиктештирилген обьекттерди аныктоо жана мамлекеттин менчигине кайтаруу боюнча иш-чаралар дагыле кызуу улантылууда.

Алишер ТОКСОНБАЕВ, өз кабарчы