3 Бардыгы /

Өзгөчө кырдаалдар министри Бообек Ажикеев Кыргызстандын  Түштүк башкалаасындагы сел коркунучу жогору аймактарды өзү тыкыр текшерди.

Аталган ведостводон маалымдашкандай, Кыргыз Өкмөтүнүн мүчөсү Бообек АжикеевОш шаарында жаан-чачындын кесепетинен улам сел жүрүү коркунучу бар аймактарынын ал-акыбалын жеринде баалоо максатында тиешелүү жетекчилер менен биргеликте атайын мониторинг жүргүздү. Адегенде министр Жапалак айылдык аймактык башкармалыгына баш багып, Озгур айылындагы Тотоев көчөсүндө жайгашкан сел тосмолорунун абалын жеринде көрүп чыкты. Анткени, бул аймакта сел тосмолорунун айрым бөлүктөрү ылай-баткакка толуп, тазалоону талап кылаары ачыкталды. Өкмөт мүчөсү бул тосмолорду ого бетер кеңейтүү жана тегиз тазалоо боюнча тиешелүү мекемелерге тапшырма берди. Ошондой эле министр Алымбек Датка муниципалдык аймактык башкармалыгындагы Подьемная көчөсүндө жайгашкан айрым курулуштарды көрүп, көйгөйлүү маселелерди баса белгиледи. Текшерүү маалында сел сайынын нугуна мыйзамсыз курулган турак үйлөр жана уруксаты жок салынган көпүрөлөр дагы аныкталды. Бул факторлор сел жүргөн маалда коркунуч жаратышы толук ыктымал. Жергиликтүү тургундарга түшүндүрүү иштерин жүргүзүү жана мыйзамсыз курулуштарды алуу боюнча тиешелүү мекемелерге тапшырма берилди.

Өзгөчө кырдаалдар министри Бообек Ажикеевдин Ош жергесине бул жумушчу сапарынын негизги максаты – калктын коопсуздугун толук кандуу камсыз кылуу, сел коркунучун алдын алуу жана өзгөчө кырдаалдардын кесепеттерин азайтуу эле. Ушул тапта тиешелүү кызматтар тарабынан бул өңүттө ыкчам иштер жүргүзүлүп жатат.

Алишер ТОКСОНБАЕВ, өз кабарчы