3 Бардыгы /

Мамлекеттик бажы кызматынын төрагасы Алмаз Салиев Кыргыз-Тажик мамлекеттик чек арасындагы жакында эле ачылган «Кызыл-Бел» жана «Кайрагач» өткөрмө бекеттерине баш бакты.

Аталган ведомстводон маалымдашкандай, ушул жылдын 13-мартынан аталган өткөрмө бекеттердин иши кайра жандангандан тартып мамлекеттик бажы органдарынын кызматкерлери штаттык режимде гана кызмат өтөп жатышат. Ал эми маалыматтык системалар жана техникалык каражаттар дагыле үзгүлтүксүз иштеп атат. Өздүк курам менен жолугушуунун жүрүшүндө Кыргыз Өкмөтүнүн мүчөсү Алмаз СалиевКыргызстан менен Тажикстандын ортосундагы соода-сатык жана маданий байланыштарды чыңдоо үчүн аталган өткөрүү бекеттеринин стратегиялык маанисин, ошондой эле көзөмөлдөөчү органдардын натыйжалуу ишинин өтө маанилүүлүгүн баса белгиледи. Эки коңшулаш өлкө ортосундагы товар жүгүртүүнү өнүктүрүү келечегин эске алуу менен инфратүзүмдү ого бетер модернизациялоого, жүк ташуучулар үчүн шарттарды мындан ары жакшыртууга жана мамлекеттик кызмат көрсөтүүлөрдүн сапатын дагы ого бетер жогорулатууга өзгөчө көңүл бурулду.

Кызматтык кыдыруунун соңунда Кыргыз-Тажик мамлекеттик чек арасындагы «Кызыл-Бел» жана «Кайрагач» өткөрмө бекеттерин Дүйнөлүк  стандарттарга ылайык реконструкциялоо жаатында жүңөөлүү сунуштарды иштеп чыгуу, автотранспорт каражаттары үчүн электрондук кезек аймактарын түзүү жана чек арадагы мамлекеттик көзөмөлдөө органдарынын кызматкерлери үчүн ыңгайлуу шарттарды түзүү жагы тапшырылды.

Алишер ТОКСОНБАЕВ, өз кабарчы