27 Бардыгы /

Жалал-Абад шаарынын борбордук аянтында өткөн иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, Жогорку Кеңештин депутаты Айбек Маткеримов, шаар мэри Эрнисбек Ормоков, мекеме-ишкана жамааттары жана калаа тургундары катышты.

Салтанатта сөз сүйлөгөн облус башчысы Тилек Текебаев жалпы катышуучуларды Нооруз майрамы менен куттуктап, бул күн – жаңылануунун, тынчтыктын, илгери үмүттүн жана молчулуктун жарчысы экенин белгиледи.

Облус башчысы өлкөдө, анын ичинде Жалал-Абад облусунда жасалып жаткан иш-чаракеттерге токтолду.

“Биз, Жалал-Абад облусун ар тараптуу өнүктүрүү боюнча конкреттүү пландарды койгонбуз. Анын алкагында, 2025-жыл Улуу Жибек Жолунун бир бутагында жайгашкан “Жалал-Абад шаары – Түрк дүйнөсүнүн туристтик борбору” – деп жарыяланды. Андыктан, быйыл Жалал-Абадка келүүчү туристтердин агымы да көбөйөт.

Ушул жылы республикалык масштабдагы Эгемендүүлүк майрамы Жалал-Абад шаарында белгиленет. Мааракеге карата облуста 34 жаңы объектилердин ачылышы болот. Быйыл облусубузда Кытай-Кыргызстан-Өзбекстан темир жолунун курулушу башталды.

Жыл ичинде Мамлекеттик Ипотекалык Компаниясы тарабынан курулган алгачкы батирлердин ачкычтары өз ээлерине тапшырылат. Аймактагы дагы бир чоң долбоорлордун бири “Жалал-Абад Эл аралык аэропортунун” курулушу башталат”, – деди Тилек Текебаев.

Майрамдык саамалыктын жүрүшү концерттик программа, театрлаштырылган көрүнүш тартууланып, курулуш компаниялардын, сүрөтчүлөрүн эмгектери, жергиликтүү ишкерлердин продукциялары коюлган жарманке менен коштолду.