3 Бардыгы /

Аксы райондук мамлекеттик администрациясынын кезектеги жамааттык жыйыны болуп “Жазгы талаа иштеринин жүрүшү талкууланды”.

Күн тартибиндеги негизги маселе боюнча райондук айыл чарбасын өнүктүрүү башкармалыгынын башчысы Таалайбек Саматов баяндама жасады. Учурда райондун аймагында жазгы талаа иштери кызуу жүрүп жатат. Ушул мезгилге чейин 2380 гектар жер айдалып жазгы дан эгин, көп жылдык чөп, жайыттарга жайыт чөптөрүн байытуу боюнча үрөндөр себилди. Ал эми 950 тонна минералдык жер семирткичтер ташылып келинип,  дыйкандар сатып алышууда. Дыйкандарды арзан күйүүчү май менен камсыздоо максатында өкмөт тарабынан 99,5 тонна күйүүчү май бөлүнүп берилген. Бирок, Үч- Коргон айыл өкмөтүнөн башка айыл өкмөттөрдүн дыйкандары күйүүчү майды алышпаган. Жыйында райондун аймагында 114 километр ички каналдар араң тазаланып, бул иш солгун жүрүп жаткандыгы өзгөчө белгиленди. Быйылкы жылда райондо эки МТС уюштуруу мерчемделүүдө. Айрым айыл өкмөттөрдө жайыт акысын топтоо, жайыттар менен иштөө начар болуп жаткандыгы белгиленди. Райондо жайыттарды жакшыртуу иштери да жүрүп жатат, атап айтканда

326 гектарга жайыттарга үрөндөр себилди. Мол түшүмдүн негизи бул суу. Эгин аянттарына келүүчү ички каналдарды тазалоо иштери кечигип жүргүзүлүүдө. Атап айтканда  Үч -Коргон айыл аймагында 91 километр ички каналдар тазаланып, жазгы суугат иштерине негизинен даяр болуп калган, бирок тоо зонасында эми гана башталып жатат. Каналдарды тазалоо иштери райондук суу чарба башкармалыгына өткөрүлүп берилген деген шылтоолор менен каналдарды тазалоо иштери солгун жүрүп жатат. Өткөн жылы ушул мезгилге ички каналарды тазалоо 38 пайыз болгон болсо, быйыл 25 пайызга араң аткарылган. Бул ишти тездетүү райондук суу чарба башкармалыгына милдеттендирилди. Эгин талааларынан пленкаларды тазалоодо көйгөй болуп жаткандыгы айтылып, бул ишке өзгөчө маани берүү тийиштүү жетекчилерге тапшырылды.

Абдымомун КАЛБАЕВ, Аксы району