30 Бардыгы /

Бүгүн, 28-мартта Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов Индия Республикасынын Кыргыз Республикасындагы Атайын жана Ыйгарым укуктуу Элчиси Бирендер Сингх Ядав менен жолугушту.

Облус башчысынын биринчи орун басары Жалал-Абад облусунун социалдык-экономикалык, өнөр-жай ишканалары тууралуу маалымат берди. Мындан сырткары Индия өлкөсү менен Жалал-Абад облусунун стратегиялык өз ара байланыштары, алдыдагы пландарын талкуулашты.

Нурлан Эрматов Жалал-Абад облусу Индия өлкөсү менен негизинен билим берүү тармагында тыгыз кызматташып келээрин, азыркы учурда 2000ден ашуун студент медициналык багытта билим алып келе жатканын белгиледи. Ошол эле учурда студенттердин коопсуздук маселеси да көзөмөлгө алынганын айтты.

Индия Республикасынын элчиси Бирендер Сингх Ядав жылуу кабыл алуу үчүн ыраазычылык билдирип, Жалал-Абад облусу менен билим берүү, ошол учурда чакан ГЭСтерди куруу жана аймактагы алтын өндүрүмүнө кызыктар экенин билдирди.

Жолугуунун соңунда ыйгарым укуктуу өкүлдүн биринчи орун басары тараптардын достук байланыштарын бекемдөө, биргелешкен демилгелерди ишке ашырууга ар дайым көмөк көрсөтүүгө даяр экенин белгиледи.