42 Бардыгы /

Борбор Азиядагы эң ири Кара-Суу шаардык базарынын аймагында жайланышкан жалпы аянты 5600 чарчы метр жер тилкелери акыры мамлекеттин балансына толук кайтарылды. Бул тууралуу Улуттук коопсуздук мамлекеттик комитетинен билдиришти.

 Тергөөнүн жүрүшүндө – жер тилкелерин каттоодо Кыргыз Республикасынын жер мыйзамдарынын талаптары одоно бузулгандыгы аныкталды. Белгилей кетчүү жагдай: аталган базардын аймагы «Айыл чарба багытындагы жерлер» категориясына кирет, бирок, ал иш жүзүндө коммерциялык максатта колдонулган, бул боюнча «Кыргызгипрозем» мамлекеттик ишканасынын расмий маалыматтары тастыктайт.

Баса, чукул жүргүзүлгөн тиешелүү иш-чаралардын натыйжасында аталган рыноктун аймагынын мурдагы ээлерине ижара акысы түрүндө ай сайын 250 миңден 300 миң сомго чейин акча каражаттары келип түшкөндүгү, ал эми бир соода түйүнүнүн орточо наркы 60 миң акш долларын түзөөрү дагы биротоло аныкталды.

Ошентип, тергөө-ыкчам иш-чараларынын натыйжасында гана жогоруда аталган жер тилкелери чыныгы ээсине – мамлекеттин балансына толук бойдон кайтарылды.

Алишер ТОКСОНБАЕВ, өз кабарчы